Apostole 11 - Nuevo Testamento Romané 2007

O Pedro ando Jerusalem ppenel so cherda e llenenge katar e kkanlliri

¹ E apostolura ta e pplal kai sea ande Judea asunde kai i e llene kai inai judiura pachaie ande leke alava.

² A kana o Pedro irisailo ando Jerusalem, nesave llene kai pachana ta sea katar e judiura dena leke orbe.

³ Ta puchle le: —¿Soke llelan kai e llene kai inai judiura, ta jalan lenchar?

⁴ O Pedro ppenda lenge sa so avilape. Ta ppenda:

⁵ —Me sema ando foro katar o Jope, ta kana molivaman sikadila mange sargo iek suno: ta dikklem sargo iek baro chiti kai saia ppanglo pe star riga kai fuliela katar o miloso llik kote kai sema me.

⁶ Ondaka dikklem mai sukar te sai llanau so saia andre, ta dikklem zivirinie stare porrnenge, ta sapa ta chiriklia.

⁷ Ta asundem iek avazi kai ppenda mange: ‘Uste Pedro; mundar ta ja.’

⁸ Me ppendem: ‘Na Gazda, soke nikada ni jalem niso melalo.’

⁹ Ondaka o avazi kai avela katar o miloso dia manchar orba pale ta ppenda mange: ‘So o Del chistosarda, na ppen tu kai si melalo.’

¹⁰ Gava avilape trin droma, ta mapalal sa so dikklem llelotar upre ando miloso.

¹¹ Ondaka, trin llene bichalde katar e Sesarea avile te roden man kai o cher kai me ziviva.

¹² O Duo ppenda mange te na darau niso ta te llau lenchar. Ta llele manchar i gala sou pplal. Sa diam ando cher katar iek lleno,

¹³ kai ppenda amenge sar dikklaia iekke suecho ande po cher, kai achilo pe porrne ta ppenda leke: ‘Bichal vareka ando foro katar o Jope te anen e Simono, kai ppenen leke Pedro;

¹⁴ vou ka ppenel chuke sar sai ave braduime, tu ta i sa chi familia.’

¹⁵ Kana ttode man te dau lenge orba, o Santo Duo avilo pe lende isto sar omanglal aviloia pe amende.

¹⁶ Ondaka mislisailem so ppendaia o Gazda: ‘Chachimaia o Juan kristisarda e paiea, a tumen ka aven kristime e Santone Duoa.’

¹⁷ Ta dia len o Del isto so dia amen kai pacha ando Gazda o Jesukristo, ¿a ko sem me te ppenau e Devleke kai gua nasti avelpe?

¹⁸ Kana e pplal katar o Jerusalem asunde gaia orba, ni die ios orbe jolinaia ta blagosisarde e Devle, ta ppenena: —¡O Del ikkarel te irinpe lete i golen kai inai judiura ta te len o zivoto ostade!

E kkanlliri katar e Antiokia

¹⁹ Kana mulo o Esteban, mapalal ttode te roden e llenen kai pachana ando Jesus te maren len, ta nesave saia te nasen ta lleletar ande Fenisia, ando Chipre ta ande Antiokia. Kote ppende e judionenge e lachi viasta.

²⁰ A nesave llene kai pachan kai sea katar o Chipre ta katar o Sirine avile ande Antiokia ta die orba i e llenenge kai inai sea judiura, ta ppenena lenge e lachi viasta e Jesukristoki, o Gazda.

²¹ E zor e Gazdaki saia lenchar, ta gia but llene mukle po pachape o purano ta pachaie ando Gazda.

²² E llene e kkanllirake katar o Jerusalem, kana asunde gaia viasta, bichalde e Bernabee ande Antiokia.

²³ Kana avilo o Bernabe dikkla sar o Del blagosisardaia len, ta veselisailo but ta ppenda saurrenge te llan chachimaia pala o Gazda sa pe liea.

²⁴ Soke o Bernabe saia iek lleno lacho, pperdo katar o Santo Duo ta pperdo pachape ta gia but llene diepe kai o Gazda.

²⁵ Mapalal kana nakkle gala ezgode, o Bernabe llelo ando Tarso te rodel e Saulo,

²⁶ ta kana malada le, inllarda le ande Antiokia ta kote achile e llenenchar katar e kkanlliri burs llive, ta sikavena bute llenen. Kote ande Antiokia saia e purvo drom kai ikkarde len kristianura.

²⁷ Ande gola llivesa nesave poraukura llele katar o Jerusalem ande Antiokia.

²⁸ Ta iek lendar kai ikkardola Agabo, ttodape pe porrne ta o Duo cherda le te del orba, ta ppenda kai ka avel but bari bok ande sa o sueto, ta gua avilape ande llivesa katar o charo o Klaudio.

²⁹ Ondaka ande Antiokia e llene kai pachana ando Jesus mangle te pomozin e pplalen kai zivina ande Judea, ta bichalde lenge prema so sai dela suako lleno,

³⁰ Ta gia cherdele, chidie love ta die len kai o Bernabe ta kai o Saulo te inllaren len kai e ppure katar e Judea.