Apostole 1 - Nuevo Testamento Romané 2007

O Jesus ppenel kai ka avel o Santo Duo

¹ Ande mo purvo lil, glamno Teofilo, pisisardem katar sa so cherda ta sa so sikada o Jesus sar kana lia te cherel pi buchi

² llik kai o llive kana llelo ando miloso. Ta mai anglal te llaltar, o Santo Duo cherda te ppenel so saia te cheren e apostolura kai vou esvirisardaia.

³ Ta kana o Jesus ustilo katar o meripe sikadilo lenge, ta gia dikkle kai chachimaia saia llundo. Ta saranda llive sikadilo lenge ta dela lenge orba katar e charoina e Devleki.

⁴ Ta kana saia e apostolenchar, o Jesus ppenda lenge: na llantar katar o Jerusalem. Mai sukar aduricharen te cherdol o alau kai mo Dad dia tumen ta kai me ppendemle tumenge.

⁵ Chachimaia o Juan kristisarda e paiea, a nesave llivesa mai angle, tumen ka aven kristime e Santone Duoia.

O Jesus llaltar upre ando miloso

⁶ E llene kai sea chidine e Jesusea puchle le: —Gazda, ¿Ka lachare ande gava vreme e charoina katar o Israel?

⁷ O Jesus ppenda lenge: —Inai tumenge te llanen o llive ni o vreme kai o Dad ttoda ande po gazdaripe;

⁸ A kana o Santo Duo ka avel upral pe tumende, ka len zor ta ka llan te den mi orba ando Jerusalem, ande sa e Juda ta e Samaria, ta pe ttana kai si mai dur pe ppuv.

⁹ Ta kana ppenda gala alava, von dikkle sar vazdinailo ando miloso ta iek oblako ucharda le ta ni dikkle le pale.

¹⁰ Ta kana dikkena ando miloso sar o Jesus duriola, dui llene furiade ando parnipe avile pasa lende

¹¹ ta ppende lenge: —Galileura, ¿soke dikken upre? Isto gava Jesus kai saia maskar tumende ta inllardilo ando miloso, ka avel pale isto gia sar dikklen le kai llaltar.

Ttoven e Matiase po ttan e Judaseko

¹² E apostolura irisaile katar o burdo e Maslinkengo ando Jerusalem: Ni ppirde but, ppirde so mukel len o zakono te ppiren ando sabado.

¹³ Kana avile ando foro, llele ande soba kai chinadea upral po cher. Von sea o Pedro, o Juan, o Santiago, o Andres, o Felipe, o Tomas, o Bartolome, o Mateo, o Santiago chavo e Alfeoko, o Simono o Selote, ta o Judas chavo e Santiagoko.

¹⁴ Sa von chidiniaona suako drom te molinpe nesave diskinienchar, e Mariaia e dei e Jesuseki, ta leke pplalenchar.

¹⁵ Ande gola llivesa o Pedro dia orba e pplalenchar kai sea chidine; von sea preko stotina ta bis llene, ta ppenda lenge:

¹⁶ “Ppalalen, saia te cherdol so si pisime, kana o Santo Duo dia orba katar o mui e Davideko kana ppenda katar o Judas, gua kai inllarda gole llenen kai ppangle e Jesuse.

¹⁷ Soke o Judas saia iek amarendar, ta radila amenchar.

¹⁸ A llelo ta chinda iek umal e lovenchar kai die le pala leko bilachipe kai cherda; mapalal pelotar e sorea ta pparrlo, ta likiste sa leke porra.

¹⁹ Kana llangle gua e llene kai zivina ando Jerusalem, ttode o anau gole umaliako Aseldama, kai ande lengi chib si: ‘O ttan e rateko’.

²⁰ Soke ando lil katar e Salmura ppenel: ‘Te achel pusto leko cher, ta te na zivil niko andre.’ Ta i ppenel: ‘Te lel leko rado aver lleno.’

²¹ “Si llene kate kai sea amenchar sa o vreme kana o Gazda o Jesus saia maskar amende,

²² sar kana kristisarda le o Juan llik kana llelotar ando miloso. Goleke, iek lendar trubul te avel amenchar ta te ppenel kai o Jesus ustilo katar o meripe.”

²³ Ondaka ppende te aven dui: o Jose, kai ppenena leke Barsabas ta i ppenena leke Chacho, ta o Matias.

²⁴ Ta molisaile gia: “Gazda, tu kai pinllare sa amare lie, ppen amenge save katar gala dui esvirisardan

²⁵ te lel o rado kai o apostol o Judas jasarda pala po bilachipe, kana llelotar kai o ttan kai saia prema le.”

²⁶ Ondaka cheldepe te dikken ko ka achel, ta achilo o Matias, kotar angle llinde le e desuiekke apostolenchar.