Apokalipsis 8 - Nuevo Testamento Romané 2007

O eftato sello

¹ Kana o Bakro putarda o eftato sello katar ni asundilo niso ando miloso llik kai o dopas o saiato.

² Mapalal dikklem efta suechura pe porrne angla o Del, ta avila lenge dine efta taturuge.

³ Ondaka avilo aver suecho kai anela iek taso sunakuno kai ttodol andre o taimano ta ttodape angla o altar ta avila leke dino but taimano te ttovel le e molimaia kai cherela o santo foro po altar sunakuno kai saia angla o trono.

⁴ Ta katar o va e suechoko o ttuv katar o taimano ta o molipe katar o santo foro llelo upre angla o Del.

⁵ Ondaka o suecho istarda o taso e taimanoko pperdale iag katar o altar ta chudiala pe ppuv; ta saia germipe, avazura esterliche, ta e ppuv dermosaili.

⁶ Ta e efta suechura kai saia len e efta taturuge ttodepe te basalen len.

E star purve taturuge

⁷ O purvo suecho basalda e taturuga ta pela pe ppuv krupe ta iag amime e ratea, ta chudinaile pe ppuv. Ta iek katar suako trin kasta ppabile, ta ppabile sa e patra zenele.

⁸ O duito suecho basalda e taturuga, ta sargo iek baro burdo kai ppabol chudinailo ande mora, ta iek katar e trin riga e morake cherdile rat.

⁹ Ta muletar iek katar suako trin zivirinie kai sea ande mora, ta iek katar suako trin llimie zatrisaile.

¹⁰ O trito suecho basalda e taturuga ta katar o miloso pelitar iek bari cherain kai ppabola sargo iek antorcha, ta peli upral pe iek katar suako trin lena ta pe paia kai liken katar e ppuv.

¹¹ Ta e cherain ikkardol Ajenjo; ta iek katar suako trin riga e paieke cherdile ajenjo, ta but llene mule cheres gola paia kai cherkile.

¹² O starto suecho basalda e taturuga ta avile ranime iek katar e trin riga e kkameke ta katar o chon ta katar e cheraia te sai cherdon truñariko iek katar suako trin lendar ta te na avel villelo ande iek katar suako trin vreme e lliveseke ta i e rachake.

¹³ Ta mapalal dikklem ta asundem iekke suecho kai furiala po maskaral katar o miloso ta ppenela bare avazea: “¡Tesko, tesko e llenenge kai zivin pe ppuv cheres ogola taturuge kai si te basalen e trin suechura!”