Apokalipsis 7 - Nuevo Testamento Romané 2007

E 144 milie sellaura

¹ Mapalal katar gala ezgode, dikklem star suechura pe porrne pe star riga e ppuviake, ta achavena e star balavia te na ppurdel ni iek balau pe ppuv ni pe mora ni pe nisavo kas.

² Ta i dikklem aver suecho kai likela katar likel o kkam, ta saia le o sello katar o Del o llundo ta urkisarda bare avazea pe star suechura, gola kai saia lenge dini e zor te zatrin pe ppuv ta pe mora,

³ ta ppenda: “¡Na zatrin e ppuvia ni e mora ni e kasten, lligo ni ka ttova o sello po chikat katar e esluge amare Devleke!”

⁴ Ta asundem gachin sea e llene kai saia pe lende o sello: Estotina ta eftavardes ta star milie katar e desudui viche e Israeleke.

⁵ Katar e vicha e Judaeki, desudui milie saia pe lende o sello. Katar e vicha e Rubeneki, desudui milie. Katar e vicha e Gadeki, desudui milie.

⁶ Katar e vicha e Asereki, desudui milie. Katar e vicha e Neftaleki, desudui milie. Katar e vicha e Menaseki, desudui milie.

⁷ Katar e vicha e Simeonoki, desudui milie. Katar e vicha e Levieki, desudui milie. Katar e vicha e Isakareki, desudui milie.

⁸ Katar e vicha e Zabulonoki, desudui milie. Katar e vicha e Joseeki, desudui milie, ta katar e vicha e Benjamineki, desudui milie.

⁹ Mapalal katar gala ezgode dikklem iek baro sueto kai niko nasti llinela le; sea katar sa e ppuvia, viche, forura ta chibia kai sea pe porrne angla o trono ta angla o Bakro furiade ando parno ta ande lenge va sea krangura katar e palmera.

¹⁰ Ta sa urkina bare avazea ta ppenena: “¡O braduipe si amare Devleko kai besel po trono ta i e Bakreko!”

¹¹ Ta sa e suechura sea pe porrne truial katar o trono ta katar e ppure ta e star zivotura; ta die changa angla o trono ta lengo mui reslo llik pe ppuv, ta blagosisarde e Devle

¹² ta ppenena: “¡Gia te avelpe! O blagosipe, o baripe, o bizaipe, e fala, o liubao ta e zor te aven e Devleke ostade. ¡Gia te avelpe!”

¹³ Ondaka iek katar e ppure puchla man: “¿ko si gala kai si furiade ando parno, ta katar avile?”

¹⁴ Me ppendem leke: “Tu llanele, gazda” Vou ppenda mange: “Gala si kai nakkle e bari patnia, kai jalade pe patave ta parniarde len ando rat e Bakreko:

¹⁵ “Goleke von si angla o trono e Devleko, ta radin ollivesea ta orachaia ando leko cher. Ta gua kai besel po trono ka buliarel lenge pi chara.

¹⁶ Nikada ios ni ka aven bokkale ni trusale, ta o kkam ni ka del ios pe lende, ta ni ka avel lenge tatipe;

¹⁷ soke o Bakro kai si po maskaral katar o trono, ka avel lengo chobano ta ka inllarel len kai si o pai o llundo, Ta o Del ka kosel sa e ausa katar lenge akka.”