Apokalipsis 5 - Nuevo Testamento Romané 2007

O lil ulime ta o Bakro

¹ Ta dikklem ando va o chacho goleko kai besela po trono iek lil ulime pisime andral ta i avrial, ta saia ppanglo efta sellonenchar.

² Ta dikklem iek suecho zuralo kai ppenela bare avazea: “¿Ko si lacho te sai putarel o lil?’

³ Ta niko ni ando miloso ni pe ppuv ni telal katar e ppuv ni telal katar e mora nasti putarela o lil ni te dikkel le.

⁴ Ta me rovava but, soke niko ni saia lacho te putarel o lil, ni te chitil le ni te dikkel le.

⁵ A iek katar e ppure ppenda mange: “Na rou ios, soke o liono katar e Juda dobisarda te putarel e efta sellura ta te dikkel o lil.”

⁶ Ondaka dikklem kai maskar o trono ta e star zivotura ta maskar e ppure, saia iek Bakro pe porrne sargo iek kurbano, ta sea le efta singa ta efta akka, gala si e efta duura e Devleke kai si bichalde pe sa o sueto.

⁷ Ta avilo ta lia o lil kai saia ando va o chacho katar gua kai besela po trono.

⁸ Ta kana lia o lil, e star zivotura ta e bis ta star ppure die changa angla o Bakro. Ta saurre saia len arpe ta tasura sunakune pperde taimano, kai si o molipe katar o foro santo.

⁹ Ta llilabena iek llili nevi kai ppenel gia. “Lacho san te le o lil ta te putare leke sellura, soke tu sana o kurbano; ta che ratea pochindan amen e Devleke katar suako vicha, chib, foro ta ppuv.

¹⁰ Ta cherdan amen amare Devleke charura ta popura ta ka charoi pe ppuv.”

¹¹ Ta dikklem, ta asundem e avazura katar but suechura kai sea truial katar o trono, ta katar e zivotura, ta e ppure. Ta e suechura sea millonura ta millonura,

¹² ta ppenena bare avazea: “¡O Bakro kai saia kurbano: si lacho te lel o gazdaripe ta o barvalipe, o bizaipe e zor, o liubao, o baripe ta o blagosipe!”

¹³ Ta i sa so si cherdo ando miloso, pe ppuv ta telal katar e ppuv ta ande mora, ta sa e ezgode kai si ande lende, kai ppenena gia: “¡Goleke kai si besindo po trono ta i e Bakreke, te avel o blagosipe, o liubao o baripe ta e zor ostade!”

¹⁴ Ta e star zivotura ppenena: “¡Gia te avelpe!” Ta e bis ta star ppure die changa, ta ttode po mui llik pe ppuv, ta blagosisarde gole kai zivil ostade.