Apokalipsis 3 - Nuevo Testamento Romané 2007

E porouka pala e Sardes

¹ “Pisisar i e suechoke katar e kkanlliri kai si ando Sardes: ‘Gia ppenel gua kai si le e efta duura e Devleke ta e efta cheraia: Me llanau so chere ta llanau kai pinllaren tut kai san llundo, a tu san mulo.

² Goleke ttou sama ta lachar ogola ezgode kai si te meren, soke dikklem kai e ezgode kai chere inai chache angla o Del.

³ Goleke de tut golli so lian ta so asundan ta cherle; keisao soke te na prezosardan, me ka avau pe tute sargo iek chor, ta ni ka llane o saiato kana ka avau pe tute.

⁴ A ando Sardes si tut nesave llene kai ni makkle pe patave; von ka llan manchar furiade ando parno soke dobisarde.

⁵ O lleno kai ka dobil ka furiavau le parne patavenchar, ta ni ka ikanau leko anau kai si pisime ando lil e zivotoko, ta ka ppenau angla mo Dad ta angla leke suechura kai me pinllarau gole llenen.

⁶ ¡O lleno kai si le kan te asunel so ppenel o Duo e kkanllirenge!’

E porouka pala e Filadelfia

⁷ “Pisisar i e suechoke katar e kkanlliri kai si ande Filadelfia: ‘Gia ppenel o Santo, o chachuno, gua kai si lete o klucho katar o David, gua kai kana putarel niko nasti ppandel, ta kana ppandel niko nasti putarel:

⁸ Me llanau so chere; ta ttodem angla tu iek udar putardo kai niko nasti ppandel; soke ni san but zuralo a cherdan so ppenen me alava, ta ni ppendan kai ni pinllare mo anau.

⁹ Gole llenen kai si katar e kkanlliri e judionengi kai si e Satanaseki, kai ppenen kai si judiura a von inai ta kojaven, me ka cherau te den changa angla che porrne, ta te llanen kai me volisardem tut.

¹⁰ Goleke soke kandian me alava me terpimake, i me ka arakkau tut kana ka avel o saiato katar o zumadipe, kai ka avel pe sa o sueto te aven zumade sa e llene kai zivin pe ppuv.

¹¹ Me avau oma. Na muk so si tut, te na lel niko chi korona.

¹² Gua kai ka dobil me ka cherau te avel sargo o zido kai istarel o cher me Devleko, ta nikada ios ni ka likel kotar; ta ka pisiu pe lete o anau me Devleko ta o anau katar e foro me Devleko, o nevo Jerusalem, kai fuliel katar o miloso, ta i ka pisiu pe lende mo anau o nevo.

¹³ ¡O lleno kai si le kan te asunel so ppenel o Duo e kkanllirenge!’

E porouka pala e Laodisea

¹⁴ “Ta pisisar e suechoke katar e kkanlliri kai si ande Laodisea: ‘Gia ppenel o Amen, o gua kai del e orba e chachi ta si chacho, o purvo katar so cherda o Del.

¹⁵ Me llanau so chere kai ni san ni sudro ni tato. ¡Mai sukar avilaia te avilana sudro o tato!

¹⁶ A soke san maklome, ta ni san sudro ni tato, ka chadau tut katar mo mui.

¹⁷ A tu ppene: me sem barvalo, barvailem ta niso ni trubul man; a ni llane kai inai tut veselia ta san iek lakomo, chorro, korro ta nango.

¹⁸ Goleke me ppenau chuke: te chine mandar sunakai chistome ande iag te sai ave barvalo, ta patave parne te sai furiado ta te na dikkol o lallao katar cho nangipe, ta ttou pe che akka kolirio te sai dikke.

¹⁹ Me dau pe sa gola kai voliu ta dukkavau len, goleke trudisao ta keisao.

²⁰ Me sem po udar ta ikkarau; a vareko te asunela mo avazi ta te putarela o udar, me ka dau ande lete ta ka jau lea, ta vou manchar.

²¹ Gua kai ka dobil ka dau le te besel manchar pe mo trono, gia sar me dobisardem ta beslem me Dadea pe leko trono.

²² ¡O lleno kai si le kan te asunel so ppenel o Duo e kkanllirenge!”