Apokalipsis 22 - Nuevo Testamento Romané 2007

¹ Mapalal o suecho sikada mange iek len chisti, iek pai kai del zivoto ostade ta bristo sargo e serchava kai likela katar o trono e Devleko ta katar o Bakro.

² Ta po maskaral katar o drom o mai baro katar o foro, pe dui riga katar e len saia o kas e zivotoko, kai del septelie suako chon, gua si kai del desudui droma septelie ando burs llive; ta leke patra sea te sastaren e ppuvien.

³ Ta ando foro ni ka avel niso proketime. O trono e Devleko ta e Bakreko ka avel ando foro, ta leke esluge ka blagosin le.

⁴ Sa ka dikken e Devleko mui, ta e Devleko anau ka avel pe lengo chikat.

⁵ Kote ni ka avel ios e riat, ta nika ni ka trubul e lampara ni o villelo e kkameko, soke o Del o Gazda ka avel lengo villelo, ta von ka charoin ostade.

Pase si kana ka avel o Jesukristo

⁶ Ta o suecho ppenda mange: “Gala alava si chache ta chachune. O Gazda o Del, si isto gua kai del po Duo e poraukonen, ta bichalda pe suecho te sikavel pe eslugenge e ezgode kai si te avenpe oma.”

⁷ “¡Ttoven sama; me ka avau oma! ¡Blagosime gua kai cherel so ppenen e alava katar e porouka kai si pisime ande gava lil!”

⁸ Me o Juan, dikklem ta asundem gala ezgode. Ta kana dikklem len ta asundem len, diem changa angla e porrne e suechoke kai sikada mange gala ezgode, te blagosiu le.

⁹ A vou ppenda mange: “Na cher gia, soke me sem esluga e Devleko sargo tu, sargo che pplal e poraukura ta sargo gola kai cheren so si pisime ande gava lil. Blagosisar e Devle.”

¹⁰ Ta i ppenda mange: “Na muk gurudini e porouka kai si pisime ande gava lil, soke o vreme si pase,

¹¹ “Muk e bilache te llan ande po bilachipe, ta e llene kai si le bilache mislura te llal ande pe bilache mislura; a ko si lacho manus te llal ande lachipe, ta ko si santo, te avel ios mai santo.”

¹² “Ttoven sama, me ka avau oma ta ka dau suakone llene te dobil prema so cherda.

¹³ Me sem e alfa ta e omega, o mai angluno ta o mai paluno.”

¹⁴ Blagosime gola kai jalaven pe patave, te sai jan katar o kas e zivotoko, ta te den katar o udar e foroko.

¹⁵ Avri ka achen e bilache, ta sa gola kai cheren chirimate, gola kai cheren kurvaluko, gola kai mundaren, gola kai blagosin avere delen, ta sa gola kai si lenge drago te kojaven.

¹⁶ “Me o Jesus, bichaldem me suecho te ppenel gala ezgode e kkanllirenge. Me sem katar e vicha e Davideki, e patrin kai likisti katar o kas chindo. Me sem e cherain kai klichil ttiarinako.”

¹⁷ O Santo Duo ta e romi e Bakreki, ppenen: “¡Aide!” ta gua kai asunel, i vou te ppenel: “¡Aide!” a gua kai si trusalo, te avel te piel llabe katar o pai o llundo.

¹⁸ Sa tumenge kai asunen e alava katar e porouka kai si pisime ande gava lil, me ppenau tumenge: Vareko te ttovela ios ezgode ande gava lil, o Del ka ttovel pe lete sa e zatranie kai si pisime ando lil.

¹⁹ A vareko te tromala te ikanel nesave alava katar e porauka kai si pisme ande gava lil, o Del ni ka mukel le te lel katar e septelie kai del o kas e zivotoko.

²⁰ Gua kai ppenel gala ezgode, ppenel: “Ea, avau oma.” Gia te avelpe. ¡Aide, Gazda Jesus!

²¹ O Gazda o Jesus te del po volipe saurren. Gia te avelpe.