Apokalipsis 2 - Nuevo Testamento Romané 2007

E porouka e kkanllirake kai si ando Efeso

¹ “Pisisar e suechoke katar e kkanlliri kai si ando Efeso: ‘Gia ppenel gua kai si e efta cheraia ande leko va o chacho, ta ppirel maskar e efta lampare sunakune:

² Me llanau so chere, ta llanau kai trudi tut but ande cho rado, ta llanau kai nasti terpi e bilachen, ta kai zumadan golen kai ppenen kai si apostolura a von inai, ta llanglan kai von si kojamne.

³ Terpisardan but ta radisardan but pe cho rado, soke voli mo anau.

⁴ A iek ezgoda inai mange drago tutar, kai muklan o volipe kai saia tut mai anglal.

⁵ Goleke de tut golli katar pelan ta keisao, ta cher e ezgode kai cherea omanglal. A te na chereale, ka avau oma tute ta ka ikanau chi lampara kotar katar si ttodi, te na keisailan.

⁶ A si tut gaia ezgoda kai murzi pe ezgode kai cheren e nikolaiture, ta i me murziu pe ezgode kai von cheren.

⁷ ¡O lleno kai si le kan, te asunel so ppenel o Duo e kkanllirenge! Ko ka dobil, ka dau le te jal katar o kas e zivotoko kai si po maskaral katar o paraiso e Devleko.’

E porouka pala e Esmirna

⁸ “Pisisar i e suechoke katar e kkanlliri ande Esmirna: ‘Gia ppenel o mai angluno ta o mai paluno, gua kai saia mulo ta pale zivisarda.

⁹ Me llanau e ezgode kai chere ta e patnia kai nakke ta cho chorripe, a tu san barvalo ta pinllarau o kojaipe katar e llene kai ppenen kai si judiura, a von si iek kkanlliri e judionengi kai si e Satanaseki.

¹⁰ Te na dara katar e patnia kai ka nakke, soke o llavolo ka chudel nesave llenen tumendar ande rubie te sai aven zumade des llive, goleke lla chachimaia llik kai o meripe ta me ka dau tut e korona e zivotoki.

¹¹ ¡O lleno kai si le kan, te asunel so ppenel o Duo e kkanllirenge! Sa gola kai ka dobin, ni ka len e duk katar o duito meripe.’

E porouka pala o Pergamo

¹² “Pisisar e suechoke katar e kkanlliri ando Pergamo: ‘Gia ppenel gua kai si le o jarni sano ta ostro pe duie riga:

¹³ Me llanau so chere ta kai zivi; tu san kote kai besel o Satanas ta isto gia lla chachimaia ande mo anau. Ni muklam mo pachape ni ande llivesa kana mundarde e Antipase kai dela mi orba chachi, kai mundarde le kote kai zivil o Satanas.

¹⁴ A si man nesave ezgode kai inai mange drago tutar: soke si tut kote gola llene kai ni kamen te muken o sikadipe e Balaameko, gua kai sikavela e Balake te cherel te peren ando bilachipe e Israeleke chaven, ta cherela len te jan kurbanura kai dena avere delenge, ta te cheren o kurvaluko.

¹⁵ Ta i si tut gola llene kai ni muken o sikadipe katar e nikolaite kai me murziu pe lengo sikadipe.

¹⁶ Goleke keisao, soke te na chereale, me ka avau tute oma ta ka marau man lenchar e jarniea kai likel katar mo mui.

¹⁷ ¡O lleno kai si le kan, te asunel so ppenel o Duo e kkanllirenge! O lleno kai ka dobil ka dau le te jal katar o mana gurudino, ta ka dau le iek barrorro parno kai pe lete si pisime iek anau nevo kai niko ni pinllarel le, samo gua kai lel le.’

E porouka pala e Tiatira

¹⁸ “Ta pisisar e suechoke katar e kkanlliri kai si ande Tiatira: ‘Gia ppenel o Chavo e Devleko, kai leke akka si sargo plameko iagako ta leke porrne si sargo o bronse kai klichil:

¹⁹ Me llanau so chere; ta llanau cho volipe, cho pachape, cho rado, sar terpi, ta kai cho rado akana si mai baro.

²⁰ A si nesave ezgode kai inai mange drago tutar: kai muke gole diskinia kai ikkardol Jezabel kai ppenel kai si porauka te sikavel, ta cherel me eslugen te cheren o kurvaluko ta cherel len te jan katar e kurbanura kai den len avere delenge.

²¹ Me diem la vreme te sai keilpe; a voi ni kamel katar po kurvaluko.

²² Goleke me peravau la ande postelia. Ka cherau te perel dukkadi ande postelia ta golen kai kurvinpe laia ka cherau len te nakken bari patnia, te na keinape katar e ezgode kai voi cherel.

²³ Ta lake chaurren ka raniu len merimaia, ta gia sa e kkanlliria ka llanen kai me sem gua kai pinllarel o mislo ta o lio, ta ka dau suakone llene prema so cherda.

²⁴ A tumenge ta i golenge kai si ande Tiatira, ta sa e llenenge kai inai len gua sikadipe ta kai ni pinllarde so von ikkaren, e bare ezgode gurudine e Sataneke, me ppenau tumenge kai ni ka ttovau aver pparipe pe tumende.

²⁵ A so si tumen, na muken le lligo ni ka avau me.

²⁶ Gua kai ka dobil ta kai ka cherel mo rado llik kai o son, me ka dau len o gazdaripe pe ppuvia.

²⁷ Ta ka gazdarin iekke kastea kai si sastruno, ta ka ppagen len sargo o taso kai cherel o lleno e chikatar, gia sar liem i me o gazdaripe me Dadetar.

²⁸ Ta i ka dau len e cherain e ttiarinaki.

²⁹ ¡O lleno kai si le kan, te asunel so ppenel o Duo e kkanllirenge!’