Apokalipsis 17 - Nuevo Testamento Romané 2007

E bari kurvichka dosali

¹ Iek katar e efta suechura kai sea le e efta tasura, avilo ta ppenda mange: “Aide karinga, me ka sikavau tut so si te avel e kurvichkake kai besel pe but paia.

² E charura katar sa e ppuvia amisaile laia, ta e llene e suetoke matile e moliaia katar lako kurvaluko.”

³ Ondaka o Duo inllarda man po o pusto. Kote dikklem iek diskinia besindo pe iek azdava loli kai pe late sea pisime anava kai kusena e Devle, ta sea le efta sore ta efta singa.

E diskinia pe azdava

⁴ Gaia diskinia saia furiadi ande chitura but lache, vunete sargo kaline ta lole, ta i saia lachardi ando sunakai ta ande klea but sukar, ta pe lako va saia la iek taso sunakuno, pperdo gado ta melalipe katar lako kurvaluko;

⁵ pe lako chikat saia pisime iek anau gurudino: “Babilonia e bari, e dei katar sa e kurvichke ta katar sa o bilachipe kai si ando sueto.”

⁶ Ta dikklem kai e diskinia saia mati katar o rat katar o santo foro ta i katar o rat e llenengo kai mundarde len, soke die e orba e chachi e Jesuseki. Kana dikklem la, chudisailem but.

⁷ Ondaka o suecho ppenda mange: “¿Soke chudisailian? me ka ppenau chuke so si gurudino katar gaia diskinia ta e azdava kai inllarel la, kate si efta sore ta efta singa.

⁸ E azdava kai dikklan si iek kai omanglal zivila ta akana inai; gaia azdava ka likel katar e bari jar oma te avel zatrime. E llene katar e ppuv kai lenge anava inai pisime ando lil e zivotoko sar kana o Del cherda e sueto, ka chudinpe kana ka dikken e azdava kai omanglal zivila ta akana inai, ta pale avel.

⁹ “Kote ka dikkol kate si bizaipe ta ko si llanglo: E efta sore si efta burdura kai upral pe lende besel e diskinia; a e efta sore si efta charura.

¹⁰ Panch katar gala charura peletar, iek gazdaril a akana, ta aver charo si te avel. Kana ka avel, ni ka gazdaril but vreme.

¹¹ E azdava kai zivila omanglal ta akana inai, si o ojtoto charura; ta i vou si katar e efta charura, ta ka avel zatrime.

¹² “E efta singa kai dikklan si des charura kai no ios ni charoin akana; samo iek saiato ka avel lenge dino te gazdarin e azdavaia.

¹³ Lengo mislo isto gua si, goleke ka den pi zor ta po gazdaripe e azdava.

¹⁴ Ka marenpe e Bakrea; ta o Bakro ka dobil len, ta lea si gola kai o Del esvirisarda ta si chache soke vou si Gazda e gazdengo ta Charo e charonengo.”

¹⁵ Ta i o suecho ppenda mange: “E paia kai dikklan, kote kai e diskinia besel si e ppuvia, e forura, ta e chibia.

¹⁶ A e efta singa kai dikklan pe azdava, ka murzin pe kurvichka ta ka muken la chudini ta i nangi; ta ka jan o mas lake esnagako, ta ka ppabaren la e iagaia.

¹⁷ Soke o Del ttoda ande lengo lio te cheren so vou mangel te cherdol: te aven ande iek mislo ta te den po gazdaripe e azdava, lligo ni ka cherdon e alava e Devleke.

¹⁸ E diskinia kai dikklan, si o baro foro kai gazdaril pe charura kai si ando sueto.”