Apokalipsis 16 - Nuevo Testamento Romané 2007

¹ Ondaka asundem iek baro avazi kai likela katar o cher e Devleko, ta ppenela e efta suechonenge: “Llan ta chuden pe ppuv e joli e Devleki kai si ande efta tasura.”

E efta tasura

² Ta llelo o purvo suecho ta chucharda po taso upral pe ppuv ta pe llene kai saia len e marka katar e azdava ta kai blagosina leke eslika, cherdilo lenge iek chindipe kai ni sastola ta cherniola, avila pe lende ppunia bilache ta cherne.

³ O duito suecho chucharda po taso upral pe mora, ta e mora cherdili rat, sargo rat muleko ta sogo saia llundo ande mora, mulo.

⁴ O trito suecho chucharda po taso upral pe lena ta pe paia kai liken katar e ppuv, ta cherdile rat.

⁵ Ta asundem e suecho katar e paia kai ppenela: “Chacho san tu Gazda kai san ta kai sana o santo soke chindan e kris gale ezgodenge,

⁶ soke von chudie o rat katar cho santo foro ta i katar e poraukura goleke i tu dian len te pien rat ¡soke gua si so morabi te len!”

⁷ Ta asundem avere kai katar o altar ppenela: “chachimaia Gazda, Del kai si tu sa e zor, chi krisa si chachune ta chache”

⁸ O starto suecho chucharda po taso upral po kkam, ta avila e kkameke te ppabarel e manusen e iagaia.

⁹ Ta e manusa ppabile e bare tatimaia, ta kusle e Devleko anau kai si le e zor pe gala zatranie ta ni keisaile te blagosin le.

¹⁰ O panchto suecho chucharda po taso upral po trono e azdavako, ta leki charoina achili ando truñariko, ta e llene dandarena pe chibia dukkatar.

¹¹ Ta kusle e Devle, o Del katar o miloso, katar pe dukka ta katar po chindipe kai ni sastola ta cherniola, ta ni keisaile katar so cherena.

¹² O souto suecho chucharda po taso upral pe bari len katar o Eufrates, ta sukilo leko pai te sai nakken e charura kai avena katar o oriente.

¹³ Ta dikklem kai likela katar o mui e dragonoko ta katar o mui e azdavako, ta katar o mui katar o kojamno porauko, trin duura melale sargo zanbuke.

¹⁴ Von si e duura e llavoloke kai cheren bare ezgode, ta llan kai e charura katar e ppuv ande sa o sueto te chiden len, te marenpe ando baro llive e Devleko kai si le sa e zor.

¹⁵ “Ttoven sama, me avau sargo chor. Blagosime gua kai achel llungado ta arakkel pe patave te na llal nango, ta te na dikken leko lallao.

¹⁶ Ta chidialen po ttan kai ando ebreo ikkardol Armajedon.

¹⁷ O eftato suecho chucharda po taso ande balau, ta likisto katar o trono katar o cher e Devleko kai si ando miloso, iek baro avazi kai ppenela: “¡Cherdo si!”

¹⁸ Ondaka sea esterliche ta avazura, ta germipe, ta e ppuv dermosaili zurale; ta sar kai si e manusa pe ppuv, nikada ni dermosailia gia zurale.

¹⁹ Ta o baro foro ppagilo pe trin kotora, ta e forura katar sa o sueto peletar; ta o Del diape golli katar o baro foro katar e Babilonia te del la te piel e mol katar leki joli.

²⁰ Sa e isle ta e burdura sunbisaile,

²¹ ta pela e milosotar pe manusa bare krupe kai ppariavena mai but katar e saranda kile, ta e manusa kusle e Devle cheres e bari zatrania kai mukena e krupe.