Apokalipsis 14 - Nuevo Testamento Romané 2007

O Bakro ta e esvirime

¹ Mapalal dikklem e Bakre kai saia pe porrne upral po burdo katar o Sion. Lea sea stotina ta saranda ta star milie llene, kai saia pisime pe lengo chikat o anau e Bakreko, ta leke Dadeko.

² Ta mapalal asundem iek avazi sargo but paia kai avela e milosotar, sargo iek germipe zuralo; ta o avazi kai asundem saia sargo but llene kai basalen e arpe.

³ Ta llilabena iek llili nevi angla o trono ta angla e star zivotura, ta angla e ppure. Ta niko nasti sikola gaia llili, samo e stotina ta saranda ta star milie, kai sea braduime maskar e llene kai si pe ppuv.

⁴ Von si gola kai nikada ni amisaile diskinienchar. Von si gola kai llan pala o Bakro kai go llal vou. Von si braduime maskar e llene, sargo so si dino mai anglal e Devleke ta e Bakreke.

⁵ Ta ande lenge muia ni maladilo kojaipe, soke angla o trono e Devleko von inai makkle.

O Chavo e manuseko ta sou suechura

⁶ Dikklem aver suecho kai furiala po maskaral katar o miloso ta inllarela e lachi viasta kai si ostade te ppenel la e llenenge kai zivin pe ppuv, kai go si ppuv, vicha, chib ta foro.

⁷ Ta ppenda bare avazea: “Daran e Devletar ta blagosin le, soke o vreme katar leki kris avili. Ta blagosin gole kai cherda o miloso e ppuv e mora ta o pai kai likel katar e ppuv.”

⁸ Ondaka avilo aver suecho ta ppenela: “¡Pelitar, pelitar e Babilonia o baro foro, soke cherda te pien sa e ppuvia e mol katar lako kurvaluko!”

⁹ O trito suecho avilo ta ppenela bare avazea: “Vareko te blagosila e azdava ta lake eslika ta te lela e marka pe po chikat o pe po va,

¹⁰ i vou ka piel e mol katar e Devleki joli kai avilo ttodo chisto ando taso katar leki joli; ta ka nakkel bari patnia ande iag ta ando asufre, angla e sante suechura ta angla o Bakro.

¹¹ Ta o ttuv katar leki patnia likel ostade; ta gaia patnia ni achel, ni ollivesea ni orachaia, golenge kai blagosin e azdava ta i leke eslika ta sa golenge kai len e marka katar leko anau.

¹² ¡Kate si o terpipe katar o santo foro, gola kai cheren so ppenel o zakono e Devleko ta o pachape e Jesuseko!

¹³ Ondaka asundem iek avazi kai katar o miloso ppenela mange: “Pisisar blagosime katar angle gola llene kai meren ando Gazda.” “Ea —ppenel o Duo—, ka achen te lelpe lendar o chiñipe katar lenge radura.”

¹⁴ Ondaka dikklem iek oblako parno; ta upral po oblako besela iek lleno kai dikkola sargo chavo e manuseko: ta pe leko soro saia iek korona sunakuni, ta ande leko va iek jarni bangardo sano ta ostro.

¹⁵ Ta katar o cher e Devleko likisto aver suecho kai ppenela bare avazea goleke kai besela po oblako: “¡Ttou o jarni ta chide so dia pe ppuv; soke avilo o vreme te chidiniaon e septelie kai dia e ppuv soke si resle!”

¹⁶ Ondaka gua kai besela po oblako ttoda po jarni ta chidia e septelie kai dia e ppuv.

¹⁷ Mapalal likisto aver suecho katar o cher e Devleko kai si ando miloso, ta i le saia iek jarni bangardo sano ta ostro.

¹⁸ Ta likisto katar o altar aver suecho kai gazdarila pe iag, ta ikkarda bare avazea gole kai saia le e jarni, ta ppenela: “¡Ttou cho jarni ta chin e drak katar e kasta e ppuviake, soke lake drakka si resle!”

¹⁹ O suecho chudia po jarni ande ppuv ta chinda e drak katar e kasta e ppuviake ta ttoda e drak ando baro ttan, kote kai ustadon kai gua si e joli e Devleki.

²⁰ Ta avile ustade e drakka ando baro ttan avri katar o foro ta likisto rat kai reslo llik kai e salvaria e grastenge, ta reslo llik kai e trin stotine kilometrura duratar.