Apokalipsis 12 - Nuevo Testamento Romané 2007

E diskinia ta o dragon

¹ Dikkili ando miloso iek bari ezgoda, iek diskinia furiadi e kkametar ta telal katar lake porrne saia o chon ta upral katar lako soro saia iek korona desuduie cheraiengi.

² E diskinia saia kkamni ta urkila katar e dukka soke aviloia lako vreme te maladol lake.

O dragon

³ Ta i dikkili aver bari ezgoda ando miloso, iek baro dragon lolo kai saia le efta sore ta des singa ta iek korona pe suako soro.

⁴ Ta leki pori chirdela iek katar suako trin cheraia kai si ando miloso, ta chudia len upral pe ppuv ta o dragon ttodape angla e diskinia kai saia kkamni te jal lake minone kana ka biandol.

⁵ Ta e diskiniake maladila iek murusorro kai ka gazdaril iekke kastea sastruno sa e ppuvien, ta lie lake chaurre e Devleke ta leke tronoke;

⁶ ta e diskinia nasli po pusto, kote kai o Del lacharda lake iek ttan, te sai pravaren la milia ta dui stotine ta souvardes llivesa.

⁷ Mapalal saia iek baro maripe ando miloso, o Migel ta leke suechura, marenape e dragonoia ta marelape o dragon ta leke suechura.

⁸ Ta nasti dobisarde, ta ni avila lenge ios ttan ando miloso.

⁹ Ta avilo tradino avri o baro dragon, o sap o purano kai ikkardol llavolo ta Satanas, kai kojavel sa e sueto; avilo tradino pe ppuv ta leke suechura avile tradine lea.

¹⁰ Ondaka asundem iek baro avazi ando miloso kai ppenela: “Akana avilo o braduipe, e zor ta e charoina katar amaro Del, ta o gazdaripe katar leko Mesias; soke avilo tradino avri gua kai dosarela amare pplalen, angla amaro Del ollivesea ta i orachaia;

¹¹ Ta von dobisarde le pala o rat e Bakreko, ta pala lenge alava e chache, ta lenge ni mola niso lengo zivoto, ta ni chitilape lenge te meren.

¹² Goleke veselin tumen milosura. Ta tumen kai zivin ande lende ¡A tesko e llenenge kai zivin pe ppuv ta pe mora, soke o llavolo fulisto tumende bare jolinaia soke llanel kai inai le but vreme!

¹³ Ta kana dikkla o dragon kai avilo tradino pe ppuv, llelo pala e diskinia kai maladilaia lake o minono te marel la.

¹⁴ Ta avila lake dine dui pakka katar e bari agila, te sai furial angla o sap karing o pusto kai lako ttan, kote kai saia te pravarenla trin burs ta dopas.

¹⁵ A o sap chudia katar po mui pai te sai cherel iek len palal pala e diskinia, te sai avel chirdini e paietar.

¹⁶ A e ppuv pomozisarda e diskinia, soke e ppuv putarda po mui ta nakkada e len kai o dragon chudiaia katar po mui.

¹⁷ Ondaka o dragon pperdilo joli pe diskinia ta llelo te marel e vichaia kai achilaia katar o porodo e diskiniako, gola kai cheren so ppenel o zakono e Devleko ta si len e orba e chachi e Jesukristoki.

¹⁸ Ta o dragon ttodape pasa e mora.