Apokalipsis 11 - Nuevo Testamento Romané 2007

¹ Mapalal die man iek kas te llinau e pole, ta ppende mange: “Uste ta llin gachin pole si ando cher e Devleko ta gachin pole si ando altar, ta llin gachin llene blagosin kote.

² Na llin e pole kai si avrial katar o cher e Devleko, soke gava ttan si dino golenge kai ni pachan. Von ka gazdarin ando Jerusalem saranda ta dui chon.

³ A me ka bichalau dui poraukura te ppenen murni viasta chachuni. Ka bichalau len furiade ande patave krupne te den orba milia ta dui stotine ta sovardes llive.”

⁴ Gala dui poraukura si e dui kasta maslinkenge ta e dui kandelabrura kai si angla o Del, o charo e suetoko.

⁵ Fiko te mangel te marel len, von ka chuden iag katar po mui ta ka ppabaren pe dusmanonen, a vareko te mangela te cherel lenge vareso bilacho, i von ka meren isto gia.

⁶ Gala dui poraukura si len zor te cheren te na del peke kana von ka ppenen so si te avelpe. Ta i si len e zor te bolden o pai ando rat, ta i te dukkaven e sueto nasualimaia pe gachin droma von mangena.

⁷ A kana ka nakkel o vreme kai von si te ppenen e orba e chachi, e azdava kai likel katar e bari jar ka marelpe lenchar, ta ka dobil len ta ka mundarel len.

⁸ Lenge esnage ka achen chudine pe droma katar o foro kai krustosarde e Gazda. E llenen ikkaren gale foro Sodoma ta i ikkaren le Ejipto.

⁹ Ta ande trin llive ta dopas, e llene katar sa e ppuvia chibia ta forura, ka dikken lenge esnage ta ni ka muken te prajon len.

¹⁰ Gola kai zivin pe ppuv ka veselinpe katar lengo meripe. Ka aven gia vesele kai ka den pe ezgode iek avereke, soke e dui poraukura cherena len te nakken bari patnia.

¹¹ Ondaka kana nakkle trin llive ta dopas, o Del llungada len ta pale ustile; ta sa e llene kai dikkle len, pperdile dar.

¹² Ta e dui poraukura asunde iek baro avazi kai avela e milosotar, ta ppenda lenge: “¡Aven karinga!” Ta likiste ando miloso pe iek oblako ta leke dusmanura dikkle len.

¹³ Isto kote zurale dermosaili e ppuv kai zatrisarda des katar e stotina katar o foro, ta efta milie llene mule. Gola kai achile llunde daraile but goleke blagosisarde e Devle kai si ando miloso.

¹⁴ O duito tesko nakklo; a o trito iakom avel.

E eftato taturuga

¹⁵ O eftato suecho basalda pi taturuga, ta asundile avazura zurale katar o miloso ta ppenena: “Amaro Del ta leko Mesias gazdarin e sueto; ta ka gazdarin ostade.”

¹⁶ E bis ta star ppure kai besena angla o trono e Devleko, die changa pe ppuv ta blagosisarde e Devle,

¹⁷ ta ppenena: “Fala chuke Devla, kai tu sa chere, kai san ta kai sana, soke lian chi bari zor ta ttodan tut te gazdari.

¹⁸ E ppuvia ni pachan ande tute; ta akana avilo cho llive e jolinako, o vreme kana ka chine e kris e mulenge; ta ka veseli che eslugen, e poraukonen ta che santo foro ta golen kai blagosin cho anau, avena bare o minone; ta ka zatri golen kai zatrin e ppuv.”

O cher e Devleko ando miloso

¹⁹ Ondaka putailo o cher e Devleko kai si ando miloso ta dikkola e arka katar o zakono. Ta sea esterliche ta germipe, dermosaili e ppuv ta diapeke krupe.