Apokalipsis 1 - Nuevo Testamento Romané 2007

Salami

¹ Gava si so sikada o Del e Jesukristoke katar e ezgode kai si te avenpe oma, te sai sikavel vou e llenen kai si leke esluge. Goleke o Jesukristo bichalda iekke suecho te sikavel gala ezgode e Juaneke kai si leko esluga,

² Ta o Juan ppenda sa o chachipe katar e ezgode kai dikkla ta katar e orba e chachi e Jesukristoki.

³ Blagosime gua kai chitil gava lil, ta blagosime i gola kai asunen gala alava katar e ezgode kai si te avenpe ta kanden e alava kai si pisime ande gava lil, soke pase si o vreme.

⁴ Me o Juan, bichalau salami e efta kkanllirenge kai si ande Asia. Len tumen o volipe ta e pas katar gua kai si, kai saia, ta kai si te avel; ta i katar e efta duura kai si angla leko trono,

⁵ ta i katar o Jesukristo, kai ppenel o chachipe, ta si o purvo kai ustilo katar o meripe ta kai gazdaril pe sa e charura katar e ppuv. O Kristo volil amen ta jalada amen katar amaro bilachipe pe ratea,

⁶ ta cherda amendar charura ta popura kai radin e Devleke kai si leko Dad ¡O baripe ta e zor te aven leke ostade! Gia te avelpe.

⁷ ¡O Kristo avel maskar oblakura! Suako iak ka dikkel le ta i gola kai mundarde le; ta sa e ppuvia e suetoke ka roven pala le. Ea, gia te avelpe.

⁸ “Me sem e Alfa ta e Omega” ppenel o Gazda, o Del kai si le sa e zor; gua kai si, kai saia, ta kai si te avel.

O sikadipe katar o Jesukristo

⁹ Me o Juan sem tumaro pplal, soke me sargo tumen, si man vera ando Jesukristo. Goleke sem katar e Devleki charoina; ta gia sargo tumen, si man e zor te nakkau e patnia. Me sema ppanglo ande isla kai ikkardol Patmos, soke sikavava e Devleke alava ta e orba e chachi e Jesukristoki.

¹⁰ Me sema ando Duo ando llive e Devleko, ta asundem palal pala mande iek baro avazi sargo iek taturuga,

¹¹ kai ppenela: Me sem e Alfa ta e Omega, o mai angluno ta o mai paluno, ta ppenela: “Pisisar pe iek lil so dikke, ta bichal le e efta kkanllirenge kai si ande Asia: ando Efeso, Esmirna, Pergamo, Tiatira, Sardes, Filadelfia, ta Laodisea”

¹² Boldinailem te dikkau katar avela o avazi kai dela orba manchar, ta dikklem efta lampare sunakune,

¹³ ta po maskaral katar e efta lampare saia iek lleno sargo o Chavo e manuseko, furiado iekke patavenchar kai resena llik kai leke porrne ta iek kavisi sunakuno kai resela llik kai leko brek.

¹⁴ Ta leko soro ta leke bal sea parne sargo e bakrane bal, parne sargo ttud, ta leke akka sea sargo plameko iagako.

¹⁵ Leke porrne klichina sargo o bronse kana kosen le, ta sargo kana biladol ande furnava; ta leko avazi asundilo but zurale sargo iek bari len.

¹⁶ Ta ande lako va o chacho sea efta cheraia; ta katar leko mui likela iek jarni sano ta ostro pe dui riga; leko mui saia sargo o kkam kana kletosarel zurale.

¹⁷ Kana dikklem le pelemtar kai leke porrne sargo mulo. Vou ttoda po va o chacho pe mande, ta ppenda mange: Na dara; me sem o mai angluno ta o mai paluno,

¹⁸ gua kai zivil. Me sema mulo, ta akana ziviu ostade, ta mande si e kluchura katar o meripe.

¹⁹ Pisisar so dikklan: so si akana ta so ka avel mai angle katar gala ezgode.

²⁰ Gava si so si len gurudino e efta cheraien kai dikklan pe murni chachi, ta so si len gurudino e efta lampare sunakune: e efta cheraia si e efta suechura katar e efta kkanllira, a e efta lampare si e efta kkanllira.