2 Timoteo 4 - Nuevo Testamento Romané 2007

¹ Angla o Del ta o Kristo Jesus kai ka irilpe blagosimaia sargo iek Charo te chinel kris e llundenge ta i e llenenge kai si mule, mangau tutar

² te ppene o alau e Devleko te de orba suako drom, avela o vreme lacho o avela bilacho. Cher te acharen chuke, ortosar e llenen orbaia ta de zor, de tut vreme te sikave.

³ Soke ka avel o llive kai e llene ni ka mangen te asunen o lacho sikadipe ta ka roden bute kovachen te den lenge e orbe kai von mangen te asunen.

⁴ Ni ka ttoven sama e chachimake ta ka pachan ande paramiche.

⁵ A tu na jasar cho bizaipe, terpisar e patnia, de orba katar e lachi viasta ta cher sukar cho rado.

⁶ Mo meripe avilo pase, ta ka daule sargo kurbano.

⁷ Llelem po lacho drom, avilem kote kai inai ios drom angle, llelem chachimaia.

⁸ Akana o Del kai si iek krisari chacho, gua llive ka del man iek korona kai si mo chari soke kandiem le. Ta ni ka del la samo mange, ka del la i e llenenge kai aduricharen volimaia o llive kana vou ka avel blagosimaia.

So trubul te cherel o Tito

⁹ Cher te ave oma te dikke man;

¹⁰ soke o Demas llelotar ta irisailo ande Tesalonika, soke avila leke mai drago o sueto. O Kresente llelotar ande Galasia ta o Tito ande Dalmasia.

¹¹ Samo o Lukas achilo manchar. Le tuia e Marko, soke trubul man letar te pomozil man ando rado Devlikano.

¹² E Tikiko bichaldem le ando Efeso.

¹³ Kana ka iri tut, an mange mo gertachi kai muklem ando Troade ando cher e Karpoko, ta e lila ta e pergaminura kai trubun man but.

¹⁴ O Alejandro, gua kai cherel ezgode sastrune, avilo manchar but bilacho; mardo e Gazdatar ka avel pala so cherda.

¹⁵ Arak tut i tu letar, soke inai leke drago so amen sikava.

¹⁶ E purvo drom kai chachardem man angla e llene kai gazdarin, niko ni saia pasa ma, sa mukle man korkorre. ¡Mangau e Devletar te na ttovel sama so cherde!

¹⁷ A o Del pomozisarda man ta saia manchar, ta dia man zor te dau orba katar e porouka braduimaki ta te resel kai sa e ppuvia; ta gia o Del ikanda man katar o meripe sargo te ikanel man katar e lionoko mui,

¹⁸ o Gazda ka ikanel man katar suako bilachipe, ka braduil man ta ka inllarel man ande pi charoina kai si ando miloso. ¡Blagosime te avel vou sa e bursenchar! Gia te avelpe.

Salami

¹⁹ Bichalau salami e Prisilake e Akilaseke ta e Onesimoke ta i leke familiake.

²⁰ O Erasto achilo ando Korinto, ta e Trofime muklem le nasualo ando Mileto.

²¹ Cher te ave mai anglal katar o viend. Bichalen chuke salami o Eubulo, o Pudente, o Lino, e Klaudia ta sa e pplal.

²² Te avel o Gazda ande cho lio, ta te del tut o Del po volipe.