2 Timoteo 3 - Nuevo Testamento Romané 2007

Sar ka aven e llene kana ni ka achel ios vreme

¹ Ta i morabi te llane kai ande llivesa kana ni ka achel ios vreme ka aven llivesa bilache.

² E llene ka aven lakomure, ka mislinpe samo te aven len but love, ka istardon ta ka mislin kai von si e mai glamne. Ka den bilache orbe katar o Del, ni ka ttoven sama pe dadenge, ni ka den fala ta ka maren espurnia katar o pachape.

³ Ni ka avel len volipe ni zalba, nasti ka achavenpe kana ka zelin vareso, ka aven bilache ta ka murzin pe suako ezgoda lachi.

⁴ Nasti ka avel vera ande lende ta ka aven tromane, ka joliaon kana avere ka avel le vareso, ta ka roden mai but e dragostia kai del o sueto neko e Devle.

⁵ Ka cherenpe kai si llene pachamake a ka achardol pe lende kai inai len e zor katar pachape. Gole llenenchar na amisao.

⁶ Soke gia si e llene kai den ande chera ta kojaven e diskinien kai inai len bizaipe ta kai si pperde bilachipe, ta sar nasti achaven e bilache mislure kai si ande lende,

⁷ sikon ta sikon a nikada ni acharen o chachipe.

⁸ Ta sargo o Janes ta o Jambres kai ni kamle te cheren so ppenela o Moises, i gola llene ni kamen o chachipe. Gole llenengo mislo si pperdo bilachipe ta nikada ni barilo lengo pachape.

⁹ Ni ka llan but mai angle, soke sa o sueto ka acharel kai si dile, isto sargo gola dui llene kai ni kamle te cheren so ppenda lenge o Moises.

So morabi te cherel o Timoteo

¹⁰ A tu llane so me sikavau ta llane sar ziviu pala so llau, llane mo pachape, sar dau man vreme, mo volipe ta e zor kai si man te terpiu e nuzde,

¹¹ llane sar sema mardino ta savi patnia nakklem, ta sogo terpisardem ande Antiokia, ando Ikonio ta ande Listra. ¡But maripe nakklem! A o Gazda ikanda man katar sa gola ezgode.

¹² Chachipe si kai sa e llene kai mangen te zivin ando pachape ta te aven pasa o Kristo Jesus ka aven mardine;

¹³ a e bilache ta e kojamne ios mai bilache ka llal lenge, ka kojaven ta i von ka aven kojadine.

¹⁴ Tu morabi te lla orta ande sa so sikilan, soke llane kai si chachipe. Tu llane katar sikilan gola ezgode.

¹⁵ De tut golli kai sar kana sana minono pinllare o Pisipe, kai sai sikavel tut ta sai inllarel tut kai o zivoto ostade pala o pachape ando Kristo Jesus.

¹⁶ Sa o Pisipe si cherdo katar e volia e Devleki, o Pisipe sikavel, ortol ta sikavel amen te avel amaro zivoto orta,

¹⁷ ta gia e llene kai radin e Devleke ka aven pperde katar o sikadipe, te sai cheren suako lachipe.