2 Timoteo 2 - Nuevo Testamento Romané 2007

Tromano ande nuzda

¹ Tu kai san mo chaurro, trudisao ando volipe kai si amen ando Kristo Jesus.

² So asundan kai me ppendem angla but llene, ppenle i tu e llenenge kai uzdi tut ande lende kai ka llanen te sikavenle averenge.

³ E nuzde ta e patnia nak len sargo iek boñiko katar o Kristo Jesus.

⁴ Ni iek boñiko kai si ande po rado ni amilpe ande aver ezgode kai inai leki buchi, soke morabi te avel drago pe gazdake.

⁵ Isto gia, o lleno kai leko rado si te prastel te dobil averen, nasti lel po chari te na prastela prema e zakonura.

⁶ Ta i o lleno kai radil e ppuv ta mangel te lel e septelie, mai anglal morabi te radil e ppuv.

⁷ Mislisao ande so ppenau chuke, soke o Del ka cherel te achare sa.

⁸ De tut golli katar o Jesukristo kai ustilo katar o meripe ta saia katar e vicha katar o charo o David, soke gua si ande lachi viasta kai me ppenau.

⁹ Ta pala e lachi viasta me terpiu e patnia ta i o ppandipe sargo iek kochkari; a o alau e Devleko inai ppanglo.

¹⁰ Goleke sa so nakkau, nakkaule pala e llene kai o Del esvirisarda, te sai resen i von kai o braduipe ta kai o blagosipe kai si ostade ando Kristo Jesus.

¹¹ Gava si o chachipe: Te mulam lea, i ka zivi lea;

¹² Ta avilam tromane ande patnia, ka ava ande leki charoina; te ppendam kai ni pinllara le, i vou ka ppenel kai ni pinllarel amen;

¹³ Te na avilam lea chache, vou sa iek si chacho, soke nasti ppenel kai ni pinllarel isto vou pe.

So morabi te cherel o Timoteo

¹⁴ Na muk te bristarenpe gaia ezgoda ta ppen lenge angla o Del kai morabi te na janpe, soke gola orbe ni lacharen niso ta murin e llenen kai asunen len.

¹⁵ Trudisao te ave angla o Del iek lleno kai mol le chachimaia kai radil ta inai dosalo katar ni iek ezgoda lallaimaki, kai sikavel chachimaia e orba katar o chachipe.

¹⁶ Na amisao ande orbe kai inai Devlikane, soke e llene kai den gola orbe suako drom jasaon ios mai but ando bilachipe

¹⁷ ta lengo sikadipe bariol sargo iek muka. Gua si so cherel o Imeneo ta o Fileto,

¹⁸ von jasaile katar o chachipe ta ppenen kai o llundipe e mulengo ia avilape, ta golea murin nesave llenengo pachape.

¹⁹ A o Del dia amen po alau kai si zuralo, ta kote ppenel gia: “O Gazda pinllarel golen kai si leke”, ta “Sa e llene kai ppenen e Gazdako anau morabi te durion katar o bilachipe.”

²⁰ Ande iek baro cher inai samo ezgode sunakune ta rupune, si i ezgode kastune ta gliboke; nesave si iekke llivesenge a aver si suako lliveseke.

²¹ O lleno kai mukel o bilachipe ka avel sargo iek ezgoda blagosime kai mol la but ta kai trubul e Devle te sai cherel varesavi ezgoda lachi.

²² Duriu katar e bilache ezgode kai cheren e terne kai si ande chi doba, ta rode o chachipe, o pachape, o volipe ta e pas sa e llenenchar kai ppenen o anau e Gazdako iekke liea chisto.

²³ Na ttou sama e orbenge kai ni pomozin tut; soke samo cheren e llenen te marenpe.

²⁴ Ta iek esluga e Gazdako nasti avel ande chingar, morabi te avel posteno saurrenchar. Morabi te llanel te sikavel; morabi te avel le vreme e llenechar

²⁵ ta te ortol postenimaia e llenen kai ni pachan, ta o Del sai te cherel te keimpe ta te pinllaren o chachipe,

²⁶ te llungadon ta te nasen katar o kojaipe kai ppangla len o llavolo te cherel lendar so vou kamel.