2 Timoteo 1 - Nuevo Testamento Romané 2007

Salami

¹ Me o Pablo, apostol e Jesukristoko, bichaldo e Devletar kai dia po alau kai ka del amen o zivoto kai si ando Kristo Jesus,

² bichalau salami e Timoteoke chaurro murno kai voliu le but. O Del o Dad, ta o Kristo Jesus amaro Gazda te den tut katar po volipe katar po zao ta katar pi pas.

E fala

³ Suako llive dau man golli tutar kana moliuman orachaia ta ollivesea, suako llive dau fala e Devle, radiu leke ta mo mislo si chisto, isto sar radisarde omanglal e llene katar mi vicha.

⁴ Suako llive dau man golli katar che ausa ta voliva te dikkau tut te veselilpe mo lio.

⁵ Soke dau man golli katar cho pachape kai si chacho. Mai anglal gua pachape saia che baba e Loida ta che da e Eunise, ta llanau kai i tut si gua pachape.

Na lalla katar e lachi viasta

⁶ Goleke mangau tutar te bariare e zor kai dia tut o Del kana ttodem me va pe tute ta molisailem pala tu.

⁷ Soke o Del ni dia amen o duo katar e dar, dia amen o duo katar e zor, katar o volipe ta katar o bizaipe.

⁸ Na lalla te de orba katar amaro Gazda; ta na lalla ni mandar kai sem ppanglo pala le. Le e zor kai del tut o Del te sai terpi e nuzde kai aven chuke cheres e lachi viasta.

⁹ O Del braduisarda amen ta ikkarda amen te ava katar leko santo foro inai pala vareso kai amen cherdam, soke leki volia saia ta pala o volipe kai avilale amenchar cheres o Kristo mai anglal te avel o vreme ta e bursa.

¹⁰ Gua volipe sikadilo blagosimaia ando Kristo Jesus amaro Braduimari kai zatrisarda e zor e merimaki, ta ande lachi viasta sikada o zivoto kai ni merel nikada.

¹¹ O Del dia man o rado te ppenau gaia lachi viasta ta bichalda man sar apostol ta kovachi.

¹² Goleke nakkau gala ezgode. A inai mange lallao katar so nakkau, soke me llanau ande ka pachaiem; ta llanau kai si le e zor te inllarel gaia lachi viasta kai dia mande lligo ni ka avel gua llive.

¹³ Morabi te lla prema o sasto sikadipe kai lian mandar, ta zivisar ando pachape ta ando volipe kai si amen ando Kristo Jesus.

¹⁴ Ta te pomozil tut o Santo Duo kai zivil ande amende, arak o lacho sikadipe kai si dino chuke.

¹⁵ Tu llane kai sa e llene katar e Asia mukle man korkorre ta maskar lende saia o Fijelo ta o Ermojenes.

¹⁶ Te avel zalba a Gazdake katar e familia katar o Onesiforo, soke vou dia man zor but droma ta ni lallailo kai sema ppanglo.

¹⁷ Samo avilo ande Roma rodia man ta ni achilo lligo ni malada man.

¹⁸ Te cherel o Gazda te malavel leki zalba ande gua llive. Tu llane pe gachin pomozisarda amen ando Efeso.