2 Tesalonisense 3 - Nuevo Testamento Romané 2007

O Pablo mangel te molinpe pala e lachi viasta

¹ Pplalalen, molintumen pala amende te resel pe suako rig e orba e Gazdaki ta te lenla dragostimaia, gia sar avilape maskar tumende.

² Ta molintumen pala amende te arakkel amen o Del katar e llene bilache, soke ni pachan sa e llene.

³ A o Gazda si chacho, ta vou ka del tumen zor ta ka arakkel tumen katar o bilachipe.

⁴ Ta si amen vera ando Gazda kai tumen cheren ta kai ni ka achen te cheren so ppendam tumenge.

⁵ Te pomozil tumen o Gazda te volin sar volil o Del, ta kana sen ande nuzda te del tumen e zor e Kristoki.

Saurre morabi te radi

⁶ Pplalalen, manga tumendar ando anau e Gazdako o Jesukristo, te durion katar varesavo pplal kai ni radil ta ni cherel prema so sikadam len amen.

⁷ Soke tumen llanen sar morabi te zivin te aven prema sar sam amen kana sama tumenchar; dikklen kai sama llene kai radia,

⁸ ta o marrno kai jalam pochindam le. Amen radisardam suako llive orachaia ta ollivesea te na ava iek pparipe nikake tumendar.

⁹ A chachimaia saia te manga tumendar te pomozin amen, a amen radisardam te sikon amendar so morabi te cheren.

¹⁰ Kana sama tumenchar, sikadam tumen gia: ko ni kamel te radil te na jal.

¹¹ A llanglam kai nesave llene tumendar ni radin ta aminpe ande so inai lengo.

¹² Katar gala llene manglam, ando anau e Gazdako o Jesukristo, te radin te avel len so te jan ta te na aminpe ande so inai lengo.

¹³ A tumen, cheren o lachipe suako llive ta na chinion.

¹⁴ Vareko te na ttoda sama so ppena ande gava lil, dikken ko si ta na llan lea ninde, te avel leke lallao.

¹⁵ A na dikken pe lete sargo kana vou si tumaro dusmano, den pe lete sargo pplal.

¹⁶ Ta isto o Gazda katar e pas te del tumen suako llive e pas ta sar vou kamela. O Gazda te blagosil saurren.

¹⁷ Me o Pablo, pisiu tumenge gava salami isto me vastea. Gia ttovau mo anau pe sa me lila; gia pisiu me.

¹⁸ Amaro Gazda o Jesukristo te del po volipe saurren.