2 Tesalonisense 2 - Nuevo Testamento Romané 2007

O sikadipe sar ka avel o Gazda

¹ Pplalalen, cheres so ka avelpe kana ka avel o Jesukristo ta sar ka chidiniaiva lea, manga tumendar

² te na avel tumen aver mislo gia oma ta te na muken te daravel tumen niko, soke sai te ppenen kai o Duo sikada lenge sar si te avelpe, o sai te ppenen kai diam lenchar orba amen ta sikadam len, o kai bichaldam lenge iek lil ta kai ppena lenge kai o llive e Gazdako avilo.

³ Na muken te kojaven tumen nisoia. Soke mai anglal katar gua llive si te vazdiniaon po Del leke dusmanura kana ka avel o manus o bilacho, gua kai si leke chinado o meripe.

⁴ Gua si o dusmano kai ka vazdiniaol pe sa sogo si Devlikano o kai prilichil letar te avel blagosime, ta ka resel te besel vou ando cher e Devleko, ta vou ka cherelpe o Del.

⁵ ¿Ni den tumen golli kai me ppenavale tumenge kana sema tumenchar?

⁶ Ta akana tumen llanen kai si vareso kai achavel le te sai sikadol ando vreme kai morabi te sikadol.

⁷ Soke o bilachipe kai mangel te cherel po chorial llal angle; samo trubul te ikandol gole kai si po maskaral kai achavel le.

⁸ Ondaka ka sikadol gua dusmano kai o Gazda o Jesus ka ppurdel pe lete ta ka zatril le ta ka mundarel le kana ka irilpe ande po baro blagosipe.

⁹ A gua dusmano ka avel pomozime e llavolotar; ka avel bare zoriaia ta ka cherel bare ezgode devlikane kojamne.

¹⁰ Ta ka radil suako bilachimaia te kojavel golen kai jasaon, soke ni kamle te len ta te volin o chachipe ta te braduinpe.

¹¹ Goleke o Del mukel te aven kojade katar so inai chacho ta te pachan ando kojaipe,

¹² te jasaon sa gola kai ni kamle te pachan ando chachipe, ta kai drago lenge o bilachipe.

Esvirime e Devletar

¹³ A amen morabi te da fala e Devle suako llive pala tumende pplalalen kai o Gazda volil tumen, soke o Del esvirisarda tumen te aven e purve llene kai ka aven braduime cheres o Duo kai cherel tumen sante, ta cheres o pachape kai si tumen ando chachipe.

¹⁴ Goleke ikkarda tumen o Del e lache viastaia kai amen ppendam tumenge: te avel tumen iek ttan ando blagosipe katar o Gazda o Jesukristo.

¹⁵ Goleke pplalalen, llan orta ta na bristaren tumen katar o sikadipe e puranengo kai sikadam tumen kana sama tumenchar ta i so sikadam tumen e lilenchar.

¹⁶ Isto amaro Gazda o Jesukristo, ta o Del amaro Dad kai volisarda amen ta dia amen zor ostade ta o sukaripe kai adurichara letar,

¹⁷ te del tumen zor te cheren ta te ppenen suako llive o lachipe.