2 Tesalonisense 1 - Nuevo Testamento Romané 2007

Salami

¹ Me o Pablo, o Silvano ta o Timoteo manga e Devletar te aven blagosime sa e llene kai zivin ande Tesalonika ta si len pachape, kai llan e Devlea amaro Dad, ta e Gazdaia o Jesukristo.

² O Del amaro Dad, ta o Gazda o Jesukristo te del tumen po volipe ta pi pas.

O Pablo del fala ta molilpe

³ Pplalalen, suako llive si te da fala e Devle pala tumende chachimaia, soke tumaro pachape bariol ta o volipe kai si maskar tumende suako llive cherdol ios mai baro.

⁴ Goleke isto amen da tumari orba dragostimaia kana lla ande kkanllira e Devleke pala e zor ta o pachape kai si tumen ande sa e duk ta ande nuzde kai nakken.

⁵ Golea o Del sikavel kai leki kris si chachi ta cheres gua tumen sen pristane te den ande goia charoina kai pala la nakken pe gachin patnia.

⁶ O Del si chacho ta ka patil golen kai cheren tumen te nakken patnia,

⁷ ta ka lel tumendar ta i amendar sa e nuzde. Gua ka avelpe ando llive kana o Gazda o Jesus ka sikadol pe zurale suechonenchar ando miloso maskar e plamekura e iagake.

⁸ Ka avel te patil golen kai ni pachan ando Del ta ni kanden so ppenel e lachi viasta katar o Gazda o Jesus.

⁹ E gala llene ka aven patime ta ka aven zatrime ostade, ta ka aven chudine dur katar o Gazda katar leko blagosipe ta katar leki zor,

¹⁰ ta o Gazda ka avel ande gua llive ta ka blagosil le leko Santo foro ta ka chudinpe letar sa e llene kai pachan; ta tumen pachaien ande so ppendam tumenge amen.

¹¹ Goleke suako llive moli amen pala tumende, ta manga e Devletar te cherel tumen pristane ande so ikkarda tumen, ta pala leki zor te cherdol suako lachipe kai tumen mangen ta suako rado kai o pachape cherel tumen te cheren.

¹² Ta gia cheres tumende ka avel blagosime o anau katar o Gazda o Jesus ta vou ka blagosil tumen prema o lachipe kai si e Devle ta e Gazda e Jesukristo.