2 Pedro 3 - Nuevo Testamento Romané 2007

O Gazda irilpe pale

¹ Pplalalen, gava si o duito lil kai me pisiu tumenge. Ande gala dui lila manglem te ppenau tumenge te mislin tumen orta.

² Den tumen golli so ppende omanglal e poraukura sante; ta den tumen golli katar o zakono e Gazdako o Braduimari kai e apostolura sikade tumen.

³ Mai anglal morabi te llanen kai ande llivesa kai ka aven mai angle e llene ka zivin sar von mangen ande po bilachipe ta ka puchen espurniaia:

⁴ “¿So avilape katar o alau kai ppendaia o Jesukristo kai pale ka avel? Amare dada, mule ta o sueto isto gua si sar kana cherde le.”

⁵ Gala llene ni kamen te acharen kai ollikana saia o miloso ta e ppuv, ta kai o Del pe alavea cherda te likel e ppuv katar o pai ta mukla la upral po pai.

⁶ Ta gole bare bursin dea zatrisarda gole sueto.

⁷ A o miloso ta e ppuv kai si akana isto cheres gua alau e Devleko si chinade e iagake ta isto goia iag ka ppabaren len ando llive e krisako kai si o llive kana ka jasaon e bilache.

⁸ Ta na bristaren tumen pplalalen, kai e Gazdake iek llive si sargo milia burs, ta milia burs si sargo iek llive.

⁹ Inai kai o Gazda si leno te cherel so ppenda kana dia po alau gia sar ppenen nesave llene, soke e Gazdake si zalba ta vou aduricharel tumen ta mangel te keimpe saurre ta te na jasaol niko.

¹⁰ A o llive e Gazdako ka avel sargo kana avel iek chorano. Ondaka o miloso ta sa so si ande lete ande iek baro germipe ka aven zatrime e iagatar ta e ppuv ta sa so si ande late ka ppabon.

¹¹ Isto goleke tumen morabi te zivin orta sar mangel o Del soke sa gala ezgode ka aven zatrime e iagatar.

¹² Aduricharen e Devleko llive, ta cheren te avel mai oma. Gua llive o miloso ta sa so si ande lete ka avel zatrime e iagaia, ta sa e ezgode ka bilaon ande iag;

¹³ ta amen adurichara te avel o miloso o nevo ta e ppuv e nevi kai o Del ppenda kai ka cherel, kote kai ka gazdaril o chachipe.

¹⁴ Goleke pplalalen so tumen aduricharen te cherdon gala ezgode na cheren niso bilacho te avel esmiro ande tumare golli te sai malavel tumen o Del chiste ta bi dosaia.

¹⁵ Soke tumen llanen kai o Gazda dikkel pe amende zalbaia te ava braduime ta katar gala ezgode i amaro pplal o Pablo pisisarda tumenge soke o Del dia le bizaipe te ppenel gala ezgode.

¹⁶ Ande sa e lila kai vou pisisarda vou ppenel katar gala ezgode kai nesave si but trudne te achara. A gola llene kai ni llanen niso ta i gola llene kai si kovle ando pachape ni acharenlen sukar, ta mapalal sikavenlen sa bange. Isto gia cheren ogole alavenchar kai si ando Pisipe, goleke ka aven dosale.

¹⁷ Pplalen, tumen llanen sa gala ezgode, goleke arakken tumen katar e llene bilache, ta na pachan ande so ppenen von soke sai cheren te jasaren tumaro pachape.

¹⁸ Goleke sikon ios mai but katar amaro Gazda ta Braduimari o Jesukristo, ta barion ande leko volipe. ¡Te avel blagosime o Jesukristo akana ta ostade! Gia te avelpe.