2 Pedro 2 - Nuevo Testamento Romané 2007

E kovacha kojamne

¹ I ando foro Israel sea poraukura kojamne; ta i maskar tumende ka aven kovacha kojamne. Von po chorial ka sikaven po kojaipe, ka ppenen kai o Gazda ni braduil, goleke oma ka jasaon.

² But llene ka llan pala lende ta ka zivin ando bilachipe sargo von, goleke ka den orba bilachi katar o drom e chachimako.

³ Gala bilache llene pala e illia e lovengi ka len tumendar love kojaimaia; isto pala gua ollikana o Del chinada lenge te aven zatrime ta nasti ka braduinpe katar gaia zatrania.

⁴ O Del ni prostisarda e suechonen kai cherde o bilachipe, goleke chudia len ando tufano ta mukla len ppangle ando truñariko te aduricharen o llive e krisako.

⁵ Ta o Del ni prostisarda e llenen bilache ande llivesa katar o Noe soke cherda te avel o baro bursin, ta o Noe kai sikavela o lachipe ta ios efta llene braduisaile.

⁶ Ta i o Del zatrisarda e Sodoma ta e Gomorra kai sea dui forura bilache ta ppabarda len lligo ni cherdile prajo iagako te llanen e llene bilache so sai te avelpe lendar.

⁷ Ta o Lot avilo braduime e Devletar soke saia iek lleno lacho ta saia dukkado pala e bilache ezgode kai cherena ande gala forura.

⁸ Gava lleno lacho kai zivila kote saia dukkado ande po lio soke dikkela ta asunela suako llive so cherena gala bilache llene.

⁹ O Gazda llanel te braduil katar o zumadipe e llenen kai cheren leki volia ta llanel te ttovel pe iek rig e llenen kai si lenge chinado o jasardipe ando o llive e krisako.

¹⁰ O Gazda ka del gua jasardipe gole llenen kai cheren o kurvaluko ta ni kanden golen kai gazdarin. Gala llene istardon ta ni daran te den orba bilachi katar e suechura lache;

¹¹ a e suechura kai si len mai but zor ta gazdaripe daran te kusen len angla o Gazda.

¹² Gala llene ni acharen niso, cheren sogo kamen ta si sargo e zivirinie kai biandon te istaren len ta te mundaren len. Den orba bilachi katar e ezgode kai ni acharen, goleke ka meren sargo zivirinie,

¹³ ka nakken patnia isto gia sar von cherde averen te nakken patnia. Mislin kai si vesele, ta ollivesea cheren bilache ezgode. ¡Von si iek lallao kana besel tumenchar pe iek sinia e kkanlliraki pala ezgode bilache kai cheren!

¹⁴ Gala llene nasti te dikken pe iek diskinia te na mangen te cheren laia o kurvaluko; ni chinion te cheren bilachipe. Kojaven golen kai inai len but pachape; samo llan pala e love; von si llene proketime.

¹⁵ Von llan jasarde soke durile katar o drom o chachuno ta cheren sargo o porauko Balaam chavo e Beoreko kai mangela te lel love bilachimaia

¹⁶ ta iek magarcha dia leke orba zurali sargo manus pala o bilachipe kai cherela ta ni mukla le te cherel ios dilipe.

¹⁷ Gala kovacha si sargo bunaria kai inai len pai, sargo e oblakura kai inllarel len e balau; ta si chinado kai ka achen ostade ando baro truñariko.

¹⁸ Ppenen alava sukar kai si samo kojaipe, ta cheren te peren ando kurvaluko golen kai iakom likena katar e llene bilache.

¹⁹ Sikaven o mukliardipe a isto von si esluge katar o bilachipe soke suako lleno si esluga katar so gazdaril pe lete

²⁰ Gola kai pinllarde e Jesukristo amaro Gazda ta Braduimari, ta nasle katar o bilachipe kai si ando sueto, te irinape pale kai o sueto ta o bilachipe kai si ande le, achen ios mai gore neko so sea omanglal.

²¹ Mai sukar avilaia lenge te na pinllarde o drom o chacho neko te pinllaren le ta mapalal te durion katar e santo zakono kai die len.

²² Ande lende cherdol so ppenen e llene: “O llukel irilpe kai po chadipe” ta i “O balo kai iakom jalade le pale taulilpe ando glibo.”