2 Pedro 1 - Nuevo Testamento Romané 2007

Salami

¹ Me, o Simon Pedro, esluga ta apostol e Jesukristoko, bichalau salami e llenenge kai si len iek pachape gia sukar sargo amen, soke o Del o Jesukristo kai si amaro Braduimari si lacho.

² Me mangau e Devletar te len but volipe ta pas katar o sikadipe kai si tumen katar o Del ta katar o Jesus amaro Gazda.

Te chera e Devleki buchi

³ O Del cheres pi zor dia amen sa so trubul amen te sai zivi sargo vou mangel kana cherda te pinllara e Jesukristo kai ikkarda amen katar o baripe katar e bare ezgode kai cherdam.

⁴ Pala sa gala ezgode vou dia amen sa so ppenda kai ka del amen; ezgode kuch ta bare; ta gia i tumen te aven sargo vou ta na sargo e llene bilache kai si ando sueto, kai zatrin avere pala lengo bilachipe.

⁵ Goleke morabi te trudin tumen te aven ios mai lache ta ios mai bizaipe;

⁶ te gazdarin pe tumare esnage, te terpin ta te cheren sogo vou mangel;

⁷ te molintumen e Devleke, te volin tumare pplalen, ta te avel tumen volipe.

⁸ Te cherena gala, ezgode ka aven ios mai lache ta ni ka zivin samo gia soke pinllarden e Jesukristo.

⁹ A o lleno kai ni cherela gala ezgode si sargo korro o sargo iek lleno kai ni dikkel sukar; bristardape kai o Del chistosarda le katar o bilachipe.

¹⁰ Goleke pplalalen, o Del ikkarda tumen ta esvirisarda tumen te aven katar leko foro, a te mangena te avelpe, morabi te aven vrene te cheren sa gala ezgode lache. Te cherenalen nikada ni ka peren,

¹¹ ta ka putaon tumenge e udara katar e charoina ostade kai si katar amaro Gazda ta Braduimari o Jesukristo.

O chachuno sikadipe

¹² Goleke suako drom ka ppenau tumenge sa gala ezgode i kana tumen llanenlen ta llan orta ando chachipe kai sikadem tumen.

¹³ Gaia si e buchi kai morabi te cherau so avela man zivoto, te ppenau tumenge gala ezgode suako drom.

¹⁴ Amaro Gazda o Jesukristo, ppenda mange kai ni ka nakkel but vreme ta me ka merau;

¹⁵ ta ka trudiu man te cherau te sikon ta gia kana ka merau te den tumen golli katar gala ezgode kai sikadem tumen.

¹⁶ So amen sikadam tumen katar e zor e Gazdaki e Jesukristoki ta o vreme kana ka avel pale inai paramiche kai amen ikandam amare bizaimaia, soke isto amen amare akkenchar dikklam e Gazda ande po baripe.

¹⁷ Ta dikklam le kana o Del o Dad dia le o baripe ta o liubao, kana e Devleko avazi dragostimaia ppenda: “Vou si mo Chavo kai voliu le, ande le si man veselia.”

¹⁸ Isto amen asundam gava avazi kai avela e milosostar, soke amen sama e Gazdaia po burdo santo.

¹⁹ Goleke me pachau kai so ppenena e poraukura si o chachipe, ta tumen cheren sukar kai ttoven lenge sama soke e alava kai von ppende si sargo iek memeli kai kletosarel ando truñariko llik kana ka llivosaol ta e cherain e ttiarinaki ka likel te klichil pe tumare lie.

²⁰ Na bristaren tumen kai ni iek porouka ando Pisipe nasti sikadol sar o manus mangel,

²¹ soke e poraukura ni die orba von petar; von die orba e Devletar kai o Santo Duo ppenda lenge save alava saia te ppenen.