2 Korintios 9 - Nuevo Testamento Romané 2007

¹ A inai soke te pisiu tumenge ios katar so si te chidiniaol e pplalenge ando pachape,

² soke llanau kai tumen mangen te pomozin ta suako drom ppenau e pplalenge kai si ande Masedonia kai tumen kai sen katar e Akalla, cherel burs llive mangen te pomozin, ta sa e pplal katar e Masedonia lie zor tumendar ta i von mangle te pomozin.

³ Me bichalau tumenge gale pplalen te sai den tumen zor; von ka pomozin tumen te lacharen sukar gaia buchi, ta gia ka dikkol kai saia chachuno baripe kai cherdam ande tumende.

⁴ Mislin tumen savo lallao sai nakkaia amen ta i tumen te avena manchar nesave llene katar e Masedonia ta te dikken kai tumen ni chidien niso.

⁵ Goleke avila mange sukar te mangau katar gala pplal te llan te dikken tumen mai anglal neko me te pomozin tumen ande gaia buchi, ta von ka ttovenpe tumenchar te chiden, soke tumen dien tumaro alau kai ka cherenle. Ta gia tumen ka sikaven kai den veselimaia ta volimaia ta kai ni cheren le pe zor.

Da veselimaia

⁶ Na bristaren tumen katar gava: o lleno kai del cherricha, ka lel cherricha, a o lleno kai del but, ka lel but.

⁷ Suako lleno morabi te del so ttoda ande po lio te del, na tristomaia o pe zor, soke o Del volil gole llene kai del veselimaia.

⁸ O Del sai del tumen but ezgode, gia te sai avel tumen sa so trubul tumen, ta i mai but. Ta gia sai ka pomozin averen.

⁹ Soke o Pisipe ppenel gia: “Fulada ta dia but e chorren, ta leko volipe ka achel ostade.”

¹⁰ O Del kai del e simicha e llene kai ttovel la ande ppuv, ta kai del o marrno gole kai jal le, ka del tumen sa so trubul tumen ta ka cherel suako drom te avel tumen ios mai but, te sai pomozin averen.

¹¹ Gia tumen ka aven barvale ande suako ezgoda te sai pomozin, ta kana ka chiden gola love amen ka inllara len, ta gia e pplal ka den fala e Devle.

¹² Soke kana tumen ka pomozin e pplalen ando pachape inai samo te inllara lenge so trubul len, amen galea ka inllara len te den fala ta but fala e Devle.

¹³ Gava so tumen cherden kai pomozisarden len, ka sikavel kai tumen pachaien ande lachi viasta e Kristoki ta kai kanden gola alava, goleke von ka blagosin ta ka den liubao e Devle.

¹⁴ Ta i ka molinpe pala tumende volimaia, pala o baro volipe kai o Del sikada tumenge.

¹⁵ ¡Fala e Devleke kai dia amen gia baro lachipe kai inai amen alava te sai ppena le!