2 Korintios 8 - Nuevo Testamento Romané 2007

Soke morabi te pomozi

¹ Akana pplalalen manga te ppena tumenge sar sikadilo o volipe e Devleko ande kkanllira katar e Masedonia.

² Gala kkanllira nakkle bare dukka, ta isto gia von si but vesele. Von si but chorre, a die sargo kana von sea barvale.

³ Chachimaia ppenau tumenge kai von die sa so sai dena, ta i mai but. Ta ni cherdele pe zor, soke isto von mangle te cherenle.

⁴ Ta molinape amenge te muka i len te pomozin e llenen kai si katar o foro e Devleko.

⁵ Von cherde mai but neko so uzdia amen kai ka cheren, soke isto von mai anglal diepe e Gazdake ta mapalal amenge. Gale ezgodaia cherde so o Del mangela lendar.

⁶ O Tito saia o lleno kai mai anglal ttodape te chidel maskar e llene te pomozin averen. Goleke manglam letar te llal angle gale radoia.

⁷ Tumen sen lache pe suako ezgoda: si tumen iek pachape zuralo ando Del, den orba sukar, llanen but, si tumen but zor te radin averenge, ta tumen volin amen but. Akana morabi te aven e mai lache te pomozin averen pe gaia buchi.

⁸ Me ni ppenau kai morabi te kanden man. So me mangau si te llanen sar ogola kkanllira ttovenpe te pomozin, ta gia i tumen te sikaven kai tumaro volipe si chachuno.

⁹ Tumen llanen kai amaro Gazda o Jesukristo, pala o volipe kai si le pala tumende cherdilo chorro kana vou saia barvalo, ta gia cheres leko chorripe tumen te cherdon barvale.

¹⁰ Me ppenau so misliu man katar gaia ezgoda pala tumaro lachipe. O burs kai nakklo tumen sena e llene kai mai anglal dien ta cherdenle veselimaia.

¹¹ Getosaren so ttoden tumen te cheren, ta cherenle isto e veselimaia kai saia tumen mai anglal, ta suako lleno te del prema so sai del.

¹² Soke te si vareko kai chachimaia mangel te pomozil, o Del lel letar so vou dia soke dia prema so si le. Soke o Del ni mangel so e manuse inai.

¹³ Me ni ppenau te pomozi averen, a tumen te trubul tumen; e orba si te avel saurren.

¹⁴ Akana kai si tumen but morabi te pomozin golen kai si len cherricha, a sai avelpe kai mai angle len ka avel but ta von ka pomozin tumen, ta gia ka avel saurren.

¹⁵ Gia sar ppenel ando Pisipe: “Gua kai chidia but ni avila le mai but, a gua kai chidia cherricha ni avila le mai cherricha.”

E llenen kai bichalda o Pablo

¹⁶ Fala e Devleke kai ttoda ando lio e Titoko isto goia briga kai si man cheres tumende.

¹⁷ Ta cherda so ppendem leke soke brigilpe pala tumende, ta akana llal isto vou petar soke mangel te dikkel tumen.

¹⁸ Bichalau e Titoia iekke pplale kai sa e kkanllira den leki orba pala o rado gia sukar kai cherda te bariavel e lachi viasta.

¹⁹ Ta i e kkanllira esvirisarde le te llal amenchar te inllara so chidiam, ta gale buchaia da liubao amare Gazda ta sikava kai manga te pomozi.

²⁰ Goleke ni kamam niko te del orbe bilache amendar pala so amen chidiam.

²¹ Goleke ttodam amen te chera o lachipe angla o Gazda ta i angla e manusa.

²² Ta lenchar bichalau tumenge avere pplale kai sikada amenge pe but ezgode kai si chacho ta mangel te pomozil, ta mai but akana kai si le gia bari vera ande tumende.

²³ Katar o Tito sai ppenau kai llal manchar ta e dui radi te sai pomozi tumen. Ta den tumen golli kai ogola dui pplal bichalde len e kkanllira, ta von blagosin e Kristo.

²⁴ Goleke sikaven lenge kai volin len chachimaia te sai llanen le e kkanllira ta te llanen kai si amen, soke te chera baripe ande tumende.