2 Korintios 6 - Nuevo Testamento Romané 2007

¹ Amen radi e Devleke ta moli amen tumenge te na len samo gia o volipe e Devleko,

² soke o Del ppenel ando Pisipe: “Kana avilo o vreme asundem tut; ando llive kai trubula tut o braduipe, me pomozisardem tut.” Ta akana avilo o vreme. ¡Ta akana si o llive katar o braduipe!

O Pablo nakkel patnia pala e buchi e Devleki

³ Ni kamam niko te del orba bilachi katar amaro rado. Goleke, ni chera ni iek ezgoda te peravel averen.

⁴ Ta pe suako ezgoda sikava kai sam esluge e Devleke, ta terpi esmiro ande sa gaia patnia.

⁵ Chalade amen e bichoia, ttode amen ande rubie, cherde burkania pe amende, ta isto gia radisardam zurale. But droma ni sovaia ta ni jaia niso.

⁶ Ta sikadam prema sar zivisardam kai cherdam e ezgode chachimaia, soke pinllara o chachipe, ta llana te adurichara ta si amen volipe, soke o Santo Duo si ande amaro zivoto, goleke si amen o volipe chachuno.

⁷ Pala e zor kai del amen o Del, da e chachi orba tumenge. Kana si amen patnia ni nasa latar, ppena ta chera suako drom so si orta.

⁸ Nesave droma den amen pachiu, a aver droma kusen amen; a nesave droma den orbe lache amendar, a aver droma den orbe bilache. Dikken amen sargo kojamne, kana amen so ppena si o chachipe.

⁹ Von dikken amen sargo kana ni pinllaren amen, a von llanen kai amen sam pinllarde. Sam ttode po meripe a sam pperde zivoto; maren amen, a ni mundaren amen.

¹⁰ Dikkiva sargo kana si amenge zalba, a amen sam vesele; dikkiva chorre, a bute llenen pravara; dikkiva sargo kana inai amen niso, a sa si amen.

¹¹ Pplalalen katar o Korinto, diam orba tumenchar sa amare liea ta sa amare chachimaia.

¹² Amen putardam sa amaro lio tumenge, a tumen ni putarden tumaro lio amenge.

¹³ Goleke, moliuman tumenge sargo iek dad kai molilpe pe chaurrenge, te putaren mange tumaro lio, gia sar cherdemle me tumenchar.

¹⁴ Te na avel tumen ni iek posla ande ezgode kai cheren e llene kai ni pachan. Soke ¿sai avel ande iek ttan o chachipe ta i o bilachipe? ¿O sai avel ande iek ttan o villelo ta i o truñariko?

¹⁵ Nasti avel isto gua mislo e Kristo ta e llavolo, ta isto gia: o lleno kai pachal nasti avel le isto gua mislo e llenea kai ni pachal.

¹⁶ Nasti avel ni iek posla maskar o cher e Devleko ta aver dela. Soke amen sam o cher katar o Del o llundo, isto gia sar vou ppenda: “Ka ziviu lenchar; ta ka ppirau maskar lende ta me ka avau lengo Del a von ka aven mo foro.”

¹⁷ Goleke o Gazda ppenel gia: “Liken maskar lende ta fuladon lendar Ta na dodin niso pokalime Ondaka me ka lau tumen”

¹⁸ ta ka avau sargo iek Dad tumenge, a tumen ka aven sargo me chaurre ta me chorra, gava ppenel o Gazda kai si le sa e zor.