2 Korintios 5 - Nuevo Testamento Romané 2007

¹ Amen llana kai zivi pe gaia ppuv sargo ande iek chara kai iek llive ka avel zatrime. A ando miloso si amen iek cher ostade cherdo e Devletar, na e manusendar.

² Goleke so zivia pe gaia ppuv, zelne sam te llatar kai amaro cher kai si ando miloso;

³ A i te lena gala patave amendar, llana kai incha ni ka acha bi patavengo.

⁴ A so zivia ande gaia chara kai si amari esnaga, sam but tristome ta chinie, soke ni kama te acha bi patavenge ta gaia esnaga kai si te merel te pparrudol pe o goia esnaga kai ka zivil ostade.

⁵ A O Del lacharda amenge gale ezgodake, soke vou dia amen o Santo Duo te sai pacha kai ka la gala ezgode.

⁶ Goleke si amen gaia vera ta llana kai sogo zivia ande gaia esnaga ka ava dur e Gazdatar.

⁷ Akana nasti dikka le, goleke zivi istarde katar o pachape;

⁸ goleke si amen pachape, ta amenge avela mai sukar te muka gaia esnaga ta te llatar te zivi e Gazdaia.

⁹ Goleke i te zivia kate o te llaiatar, manga te kanda e Devle.

¹⁰ Soke saurre morabi te ava pe kris e Kristoki, te sai lel suako lleno so morabi te lel prema o lachipe o prema o bilachipe kai cherela kana saia ande esnaga.

E orba te ava ande pas e Devlea

¹¹ Goleke, soke llana kai morabi te da liubao e Devle, da orba e llenenge te sai i von pachan. O Del amen pinllarel, ta aduricharau i tumen te pinllaren amen,

¹² inai kai gale orbenchar manga pale te blagosi isto amen, so amen manga si te vesilin tumen cheres amende, gia ka llanen sar te den orba gole llenenge kai mislinpe kai von si e mai bare prema e ezgode kai dikkon, a na katar so si ando lio.

¹³ A te si lenge kai amen sam dile, si soke amen manga te radi e Devleke. A te mislina kai ni sam dile, si tumare lachimake.

¹⁴ Akana o volipe e Kristoko gazdaril pe amende. Sar kana llanglam kai vou mulo pala amende, i amen mulam.

¹⁵ O Kristo mulo pala saurre, te sai gola kai zivin te na zivin von peke, te sai zivin e Kristoke kai mulo ta ustilo katar o meripe pala lende.

¹⁶ Goleke amen ni misli amen katar aver llene gia sar cherenle e llene gale ppuviake, soke omanglal i amen mislia e Kristotar gia sar mislinape von, a akana ni mislia amen gia e Kristotar.

¹⁷ Goleke, o lleno kai si e Kristoia si iek manus nevo. E ezgode purane nakkle, ta sa cherdon neve.

¹⁸ Sa gala ezgode aven e Devletar, kai lacharda amen pea cheres o Kristo ta dia amen te ppena gaia lachi viasta.

¹⁹ Gava si kai ando Kristo o Del ppagela e joli kai saia e sueto lea, ta ni lia sama katar o bilachipe e manusengo; ta amenge ppenda te inllara gaia orba.

²⁰ Goleke amen sam bichalde ando anau e Kristoko, gava si sargo kana isto o Del molilpe tumenge te asunen amari orba. Goleke, ando anau e Kristoko moli amen tumenge te lachardon e Devlea.

²¹ O Kristo ni cherda ni iek bilachipe; a cheres amende o Del llindale bilacho te sai llinel amen chache e Devleke ando Kristo.