2 Korintios 4 - Nuevo Testamento Romané 2007

E llene kai den orba e Jesukristoki

¹ Goleke ni chiniva, soke o Del ande po volipe ttoda amen te chera gaia buchi.

² Ta ni kamlam te chera gaia buchi po chorial, sargo kana si amenge lallao; ta ni cherdam e ezgode kojaimaia ta ni bangardam e Devleke alava. Goleke o Del llanel kai ppena samo o chachipe, ta angla o Del saurre sai aven len vera ande amende.

³ A e lachi viasta kai ppena te si uchardi sargo iekke dikklea, si samo golenge kai jasaon.

⁴ Goleke sar von ni pachan, o del gale suetoko cherda len korre, te na acharen ta te na dikken o villelo katar e lachi viasta katar Kristo o baro, soke letar sikadol o Del.

⁵ Amen ni diam orbe amare. E orba kai diam si kai o Jesukristo si amaro Gazda, ta kai amen sam tumare esluge soke voli e Jesuse.

⁶ Soke isto o Del kai cherda te likel o villelo katar o truñariko, vou si kai cherda te bariol leko villelo ande amare lie, te sai da gua villelo averen ta te sikava e zor e Devleki kai klichil po mui e Jesukristoko.

O pachape ande e duk

⁷ A si amen gava barvalipe ande piria cherde katar o glibo, te sai sikava kai goia zor avel katar o Del a na amendar.

⁸ Goleke i te nakkaia patnia ni jasara o pachape, i te si amen brige acha esmiro.

⁹ Llan pala amende te maren amen, a amen ni sam korkorre, peraven amen, a ni zatrin amen.

¹⁰ Kai go te llaia inllara ande amare esnage o meripe e Jesuseko, te sai dikkol leko zivoto ande amende.

¹¹ Soke amen so avaia llunde sam ttode po meripe cheres o Jesus, te sai sikadol leko zivoto ande amari esnaga merimaki.

¹² Goleke, amen i te laia te mera, tumen len o zivoto nevo.

¹³ O Pisipe ppenel: “Me pachaien, ta goleke diem orba.” Ta isto gia amen, pacha ta da orba.

¹⁴ Soke llana kai o Del ka vazdel amen katar o meripe gia sar vazdia amare Gazda e Jesuse, ta ka inllarel amen tumenchar kote kai si vou.

¹⁵ Sa gala ezgode nakka len soke voli tumen, soke te avena mai but llene kai len o volipe ta e dragostia e Devleki, gia ka aven mai but llene kai ka den le e fala te sai avel o baripe e Devleko.

¹⁶ Goleke ni chiniva i te avela kai gaia esnaga murilpe avrial, soke andral cherdol nevi suako llive.

¹⁷ E patnia kai nakka ande gava zivoto si lokki ta oma ka nakkel, a fala kai cheres e patnia o Del ka pperel amen katar pi dragostia kai ka achel ostade; iek dragostia bari ta pperdi veselia.

¹⁸ Soke amen ni brigi amen katar e ezgode kai dikkon soke gola ezgode meren, amen brigi amen katar e ezgode kai ni dikkon soke gala ezgode si ostade.