2 Korintios 3 - Nuevo Testamento Romané 2007

¹ Kana ppena sa gala ezgode inai te da orba lachi isto amen amendar. Soke ni trubul amen lila te ppenen kai amen sam lache, ta ni manga tumendar te pisinlen te sikavalen averenge. Aver llene trubul len te cheren gala ezgode.

² Tumen sen o lil kai del orba lachi amendar, gua si so trubul amen: iek lil pisime ande amaro lio, kai saurre pinllaren ta sai chitin.

³ Ta dikkol bristomaia kai tumen sen iek lil pisime isto e Kristotar ta kai isto amen diamle; iek lil kai pisisardale o Duo e Devleko kai si llundo; pisisardale ando lio e manusengo, na pe kotora barrustune.

⁴ Soke pala o Jesukristo si amen vera ando Del, ta pacha gala ezgode.

⁵ Amen inai e zor te chera niso, soke o Del si kai del amen e zor te cherale.

⁶ Soke o Del sikada amen te ppena saurrenge kai achilam pe iek nevo alau lea. Gava nevo alau inai istardo po zakono, vou si istardo po Duo e Devleko. Soke o zakono dosarel e bilache te merel, a o Duo e Devleko del zivoto.

⁷ O Del pisisarda o zakono pe kotora barrustune, ta kana diale kai o Moises, o baripe e Devleko sikadilo ta o mui e Moiseseko klichila pe gachin kai e israelitura nasti dikkena pe leko mui. A gua klichipe chinado saia te lelpe letar.

⁸ A kana ka ppendol o braduipe, gua ka avel ios mai but baripe, soke si cherdo ando Duo.

⁹ A te saia dino gia barimaia gua zakono kai ppenel kai amen morabi te mera cheres amaro bilachipe, ¡ios mai baripe ka avel kana ka ppendol e orba kai o Del llinel amen chache!

¹⁰ Soke so saia le baripe, inai le gua baripe prema o baripe mai glamno.

¹¹ A te saia le baripe so saia te getolpe, but mai baro ka avel so achel ostade.

¹² Isto goleke, soke si amen gava pachape ni dara te da gala orbe.

¹³ Ta ni chera sargo o Moises, kai ucharela iekke dikklea po mui te na dikken e israelitura kai o klichipe sa polokorre lelape letar.

¹⁴ A von ni kamle te acharen gaia ezgoda, ta llik akana, kana chitin e lila e Moiseseke, isto gua dikklo ni muken len te acharen, soke inai ikando lendar; ta gua dikklo lelpe samo e Kristoia.

¹⁵ Ta llik allive, kana chitin e lila e Moiseseke, iek dikklo ucharen len te na acharen.

¹⁶ A kana iek lleno irilpe kai o Gazda, gua dikklo lelpe letar.

¹⁷ Soke o Gazda si o Duo; ta kote kai si o Duo e Gazdako, si mukliardipe.

¹⁸ Goleke, akana kai saurre sam bi e dikklea kai ucharela amaro mui, sam sargo iek geldala kai sikavel o baripe e Gazdako, ta amaro zivoto pparudol prema lete, ta suako drom si amen mai but katar leko baripe, ta gava si cheres e buchi kai cherel o Duo e Gazdako.