2 Korintios 2 - Nuevo Testamento Romané 2007

¹ Goleke, soke ni kamama te tristou tumen ni kamlem te llau pale te dikkau tumen.

² Soke me te tristova tumen ¿Ko ka veselil man? samo tumen kai me tristosardem.

³ Me llanava kai ka veselin tumen manchar. Me ni kamama te triston man kana tumen saia te veselin man, goleke avila mange mai sukar te pisiu tumenge neko te llau tumende.

⁴ A kana pisisarden tumenge gua lil, saia mange but zalba ta gia brigime sema kai rovava. Me ni kamama te tristou tumen, so me mangava saia te llanen kai voliu tumen but.

O Pablo prostil e llene kai dia orbe bilache letar

⁵ Ni kamam te bariarau gaia ezgoda kai nakkla, gua lleno kai tristosarda man, sai avelpe kai tristosarda sa tumen.

⁶ E duk kai dien saurre gole llene si dosta.

⁷ So morabi te cheren akana si te prostin le ta te pomozin le, soke but zalba sai nasuarel le.

⁸ Goleke, me moliuman tumenge te sikaven leke pale kai volin le.

⁹ O lil kai pisisarden tumenge saia te zumavau tumen te sai llanau dal mangen te cheren sa so me ppenau tumenge.

¹⁰ Goleke, me ka prostiu gole llene kai tumen ka prostin, ta ka prostiu le te si vareso te prostilpe. Ka cheraule soke misliu man ande tumende, ta ppenaule angla o Kristo.

¹¹ Ta gia o Satanas ni ka kojavel amen, soke amen llana save ezgode bilache mangel te cherel.

E briga e Pabloki ando Troas

¹² Kana avilem ando foro o Troas te ppenau e lachi viasta e Jesukristoki, putaile mange e udara te radiu e Gazdake.

¹³ A sema brigime, soke kote ni maladem amare pplale e Tito. Goleke llelemtar katar e pplal kai si ando Troade, ta llelem ande Masedonia.

O Pablo del fala e Devle

¹⁴ Dau fala e Devle soke cherel amen te dobisara ando Kristo, ta mukla amen te inllara leke alava, kai llan pe suako rig sargo kana kkandel sukar iek meriso.

¹⁵ Soke amen sam sargo e kkand katar o taimano kai o Kristo del e Devle.

¹⁶ A golenge kai jasaon, gava taimano si lenge iek kkand merimaki, a golenge kai braduinpe, lenge si iek kkand kai del len zivoto. ¿A ko sai cherel gaia buchi?

¹⁷ Amen ni chera arli e alavenchar kai mukla o Del, sar cheren but llene; amen da orba chachimaia soke o Del bichalda amen ta sam ande iek ttan e Jesukristoia.