2 Korintios 13 - Nuevo Testamento Romané 2007

¹ Galea si trin droma kai ka llau te dikkau tumen. Suako alau morabi te ppendol angla dui o trin llene.

² O duito drom kai sema tumende, ppendem tumenge, ta akana kai sem dur tumendar ppenaule pale, kai ka avau zuralo gole llenenchar kai cherde o bilachipe ta sa golenchar kai mai angle cherenale,

³ ta cheraule soke tumen mangen te sikavau tumenge kai me alava si e Kristoke ta o Kristo inai kovlo tumenchar soke vou sikavel pi zor maskar tumende.

⁴ O Kristo saia kovlo kana krustosarde le, a akana zivil cheres e zor e Devleki. A isto gia e Kristoia amen sam kovle, a lea ka zivi pala e zor e Devleki te sai pomozi tumen.

⁵ Mislin tumen sar zivin, te dikken dal pachan chachimaia ando Kristo; zumaven tumen isto tumen. A so, ¿Ni acharen kai o Kristo si ande tumende? ¡A sai avelpe kai ande gua zumadipe ka dikklen kai o Kristo inai ande tumende!

⁶ Me pachau kai tumen ka acharen kai amen nakklam sukar gua zumadipe.

⁷ Amen moli amen e Devleke tumen te na cheren niso bilacho; ta galea inai kai amen manga te sikava kai nakklam sukar gava zumadipe, so amen manga gale ezgodaia si, tumen te cheren o lachipe i te dikkola kai amen ni nakklam sukar gava zumadipe.

⁸ Amen morabi te chera samo gola ezgode kai bariaven o chachipe, a na e ezgode kai peraven o chachipe.

⁹ Goleke, veseli amen kai sam kovle te sai tumen aven e zurale; ta ka moli amen te aven mai orta.

¹⁰ Pisiu tumenge gava lil mai anglal te llau te dikkau tumen, gia kana ka llau te na avau zuralo tumenchar. E zor kai dia man o Gazda, inai te zatriu tumen; gaia zor kai dia man si te sai vazdiniaol tumaro pachape.

Salami saurrenge

¹¹ Goleke pplalalen, mangau te zivin veselimaia ta te roden te aven chache ande tumaro zivoto. Den tumen zor iek avere ta zivin ande pas, ta o Del kai volil amen ta del amen e pas, ka avel tumenchar.

¹² Den tumen iek chumidipe santo, gava ka avel tumaro salami. Sa e pplal ando pachape bichalen tumenge salami.

¹³ O Gazda o Jesukristo te blagosil tumen, o Del te sikavel tumenge po volipe, ta o Santo Duo te avel tumenchar. Gia te avelpe.