2 Korintios 12 - Nuevo Testamento Romané 2007

O Pablo dikkel ezgode Devlikane

¹ Niso ni mol iekke lleneke te falil vou pe angla aver. A me morabi te ppenau tumenge cheres e ezgode Devlikane kai sikada mange o Gazda.

² Pinllarau iekke llene kai llal pala o Kristo ta cherel desustar burs kai inllarde le kai o trito miloso. Ni llanau dal inllarde le ande esnaga o ando duo; gua o Del llanel.

³ Ta llanau kai gua manus (ande esnaga o ando duo; samo o Del llanel le)

⁴ avilo inllardo ando paraiso, ta kote asunda alava gia gurudine kai ni muken nisave manuse te ppenel len.

⁵ Me ande iek lleno gia sai faliu man, a na me mandar, soke me samo sai dau orba katar mo kovlipe.

⁶ A me te mangava te faliu man, gua ni avela ni iek dilipe soke ppenava o chachipe; a me ni cheraule te na mislilpe niko mandar mai but neko so sem o so ppenau,

⁷ cheres e ezgode Devlikane kai sikada mange o Del. Ta te na pperdivau baripe, avila mange iek patnia sargo iek karrno ande mi esnaga, iek karrno bichaldo katar o Satanas te dukkavel man.

⁸ Ta trin droma molisailem e Gazdake te lel mandar gaia patnia;

⁹ a o Gazda ppenda mange: “Tut trubul samo mo volipe; soke mi zor sikadol ando kovlipe.” Goleke mange si mai sukar te faliu man ande mo kovlipe, gia te avel pe mande e zor e Kristoki.

¹⁰ Goleke veseliu man kai sem kovlo, kai kusen man, kai inai man so trubul man, kai mangen te maren man, ta i katar e bari patnia kai nakkau pala o Kristo, soke kana mai kovlo sem, ondaka si kana mai zuralo sem.

¹¹ Akana cherdem me man sargo iek dilo ta tumen cherden te cheraule. Soke tumen saia te den orbe lache mandar, soke pe ni iek ezgoda sem mai tele neko gola bare apostolura. ¡Ta gua kai man ni mol man niso!

¹² E bari patnia kai terpisardem esmiro, e bare ezgode Devlikane kai tumen dikklen, gola si e ezgode kai sikaven kai me sem iek chachuno apostol.

¹³ Prostin man te dukkaden tumen, samo pe iek ezgoda tumen sena mai tele neko ogola kkanllira: ¡soke ni pomozisarden man!

O Pablo ppenel kai pale ka llal te dikkel len

¹⁴ Me lachardem sa te llau te dikkau tumen o trito drom, ta ni akana ni ka mangau tumendar te pomozin man. Me ni rodau so si tumen, so me rodau si isto tumen; soke e dada si kai morabi te roden love pe chaurrenge, a na e chaurre pe dadenge.

¹⁵ Me ka dau sa so si man, ta isto me man pala tumaro lachipe. Me voliu tumen but ¿A soke tumen volin man gia cherricha?

¹⁶ Tumen llanen kai me ni sema iek pparipe tumenge. A si nesave llene kai ppenen kai me bizaimaia cherdem tumen te peren ande iek kojaipe.

¹⁷ A so, ¿kojadem tumen e llenenchar kai bichaldem tumenge?

¹⁸ E Titotar manglem te llal te dikkel tumen, ta lea bichaldem ogole pplale. A so ¿o Tito mangla vareso tumendar? O Tito ta me ppirdam ande iek duo tumenchar.

¹⁹ A sai avelpe kai tumen mislin kai amen manga tumendar te prostin amen, a gava inai gia. Amen da orba angla o Del ta sam llene e Kristoke, ta sa gala ezgode si te sai barion ando pachape.

²⁰ Mi dar si kai kana ka llau te dikkau tumen ni ka aven sar me voliva te aven, ta ni tumen te na dikken man sar tumen volina te dikken man. Darau te na malavau maskar tumende brasnia, armaia, joli, bune, baripe, ta bilachipe.

²¹ Ta i darau kai kana ka llau tumende, o Del sai cherel te avel mange lallao tumendar, soke cherel but vreme kai tumen cheren o bilachipe, ta sai cherel man te rovau pala but llene tumendar kai ni muklem o bilachipe, ta ni o kurvaluko ta e ezgode bilache kai cheren.