2 Korintios 11 - Nuevo Testamento Romané 2007

O Pablo ta e poraukura kojamne

¹ ¡Terpin mange akana cherricha dilipe! Sargo te avela, terpin mange.

² Soke o volipe kai si man pala tumende avel katar o Del. Goleke tumen morabi te aven angla o Kristo sargo iek chei kai si mangli te zinilpe iekke chavea, a gua chavo si o Kristo.

³ Si mange iek dar kai sai cheren isto so cherda e Eva kai kojada la o sap pe bizaimaia, ta i tumen sai kojavel ta sai duriavel tumare mislura lache ta chiste kai si tumen katar o Kristo.

⁴ Soke tumen kana avel vareko te del tumenge orba katar iek Jesus kai inai isto gua kai amen diam tumenge orba, tumen len le dragostimaia; ta len aver duo kai inai isto gua Duo kai lien, ta len aver lachi viasta kai inai isto goia lachi viasta kai lien, ta drago tumenge gola llene.

⁵ Goleke, me ni acharau man mai minono neko gola bare apostolura kai avile mapalal.

⁶ Me i te na dava orba but sukar, llanau mai but ezgode neko von; ta gala ezgode kai ppenau sikadamlen tumenge suako drom pe suako ezgoda kai chera.

⁷ ¿Sai avelpe kai cherdem bilachipe kana ppendem tumenge e lachi viasta ta ni manglen te pochinen mange, ta me cherdem man mai minono te sai cherau tumen mai bare?

⁸ Liem katar aver kkanllira lenge love te sai radiu tumenge.

⁹ Ta kana sema maskar tumende ta trubula man vareso, nikada ni manglem tumendar te pomozin man soke e pplal kai avile katar e Masedonia die man so trubula man; soke ni kamlem te avau iek pparipe tumenge, ta gia ka cheraule suako drom.

¹⁰ Gia sar pachau kai pinllarau o chachipe e Kristoko, isto gia llanau kai niko ni ka lel mandar gaia veselia ande sa e ppuv katar e Akalla.

¹¹ ¿Soke dau orba gia? ¿Sai avelpe kai ni voliu tumen? ¡O Del llanel kai voliu tumen!

¹² Goleke me ka cherau so cherau te na dau iek ttan gole llenen kai roden te aven len o baripe kai si amen;

¹³ soke von si iek apostolura kojamne ta furiadon sargo apostolura e Kristoke.

¹⁴ Ta gaia ezgoda kai cheren inai chudo, soke isto o Satanas furiadol sargo iek suecho e villeloko;

¹⁵ goleke, gola kai pomozin le mangen te dikkon sargo llene kai cheren o lachipe. ¡Ta lengo son ka avel prema e ezgode kai cheren!

O Pablo nakkel bari patnia soke si apostol

¹⁶ Pale ppenau tumenge: niko te na mislilpe kai me sem dilo; a te mislina kai sem dilo, muken man te dau orba sargo iek dilo, ta gia i me te faliu man cherricha,

¹⁷ gia ka dau orbe dile kai e Gazdake inai drago.

¹⁸ ¡Goleke, sar si but llene kai falin isto von pe, i me ka cheraule!

¹⁹ Tumen sen but bizai a tertpin dragostimaia e dilenge,

²⁰ ta terpin gole llenenge kai cheren tumen te aven esluge, kai len tumare ezgode, kai kojaven tumen, kai cheren baripe angla tumende ta kai chalaven tumen ando mui.

²¹ I te avela mange lallao te ppenaule, amen sama but kovle tumenchar. A te avile von tromane te falinpe, i me ka cheraule i te avela gaia ezgoda iek dilipe.

²² Te si von ebreura, i me sem ebreo. Te si von israelitura, i me sem. Te si von katar e vicha e Abraameki, i me sem katar e vicha e Abraameki.

²³ Te si von esluge e Kristoke, me semle mai but neko von, i te avava iek dilo kai ppenau gaia orba. Me radisarden mai but neko von, man ppangle mai but droma neko len, man chalade mai but droma e bichoia neko len, ta but droma sema pasa o meripe.

²⁴ Panch droma e judiura marde man, ta suako drom chalade man tranda ta inia droma e bichoia.

²⁵ Trin droma marde man e kastenchar, ta iek drom chudie e barrenchar ande mande, ta trin droma achili tala o pai e bari llimia kai llava ande late, ta nakklem iek riat ta iek llive andre ande mora ta maka tasivau.

²⁶ Pe but riga llelem, nakklem paia ta maka merau, sema maskar e chor ta maka mundaren man, sema maskar e llene katar mi ppuv ta i von maka mundaren man, ta i maskar e llene kai inai judiura. Ta sema pasa o meripe ando foro pe droma ande mora ta i pasa o meripe maskar e llene kai cherenape kai sea pplal.

²⁷ Radisardem but; nakklem bari patnia; but droma ni sovava; nakklem bok ta i trus ta aver droma ni jalem niso; but droma nakklem patnia cheres o sil ta ni saia man so te ttovau pe ma.

²⁸ Ta cheres gala ezgode ta i aver, suako llive ppariol pe ma e briga katar sa e kkanllira.

²⁹ A vareko te nasuaol, i me nasuaivau; a te cherena te perel vareka, me joliaivau.

³⁰ Te si te faliu man ande vareso, ka faliu man ande mo kovlipe.

³¹ O Del ta Dad katar amaro Gazda o Jesukristo kai si blagosime ostade, llanel kai ppenau o chachipe.

³² Kana sema ando Damasko, o baro sudo kai gazdarila ande ppuv katar o charo o Aretas, ttoda boñikura pe udara e foroke, te sai ppanden man;

³³ a sea nesave llene kai fuliarde man ande iek kotaricha katar iek putardipe kai saia po zido e foroko, ta gia naslem katar lenge va.