2 Korintios 10 - Nuevo Testamento Romané 2007

E zor kai si e Pablo

¹ Nesave ppenen kai sem but darano kana sem maskar tumende, a kana sem dur ppenen kai sem but tromano.

² Goleke moliuman tumenge, kana ka llau te dikkau tumen, na cheren man te avau tromano gole llenenchar kai den amare orbe ta ppenen kai amen chera e ezgode sar cherenlen e llene katar gava sueto.

³ O chachipe si kai sam manusa, a ni mara amen sar marenpe e llene katar gava sueto.

⁴ Amen ni mara amen ni kastenchar ni churienchar sar marelpe o sueto, so si amen te mara amen si e zor e Devleki kai sai ppagel bare zidura. Ta galea amen ppaga e dos kai ttoven pe amende.

⁵ Ta i achava gole llenen kai istardon ta kai achaven averen te pinllaren e Devle. Ta suako mislo e manusengo anale kai o Kristo te sai kanden le,

⁶ ta ka dukkava sa golen kai ni kanden, ta ka chera gaia ezgoda kana tumen ka kanden chachimaia.

⁷ Tumen dikken e ezgode prema sar dikkon. A vareko te pachala kai si e Kristoko, morabi te ttovel sama kai i amen sam e Kristoke.

⁸ I te cherava mai but baripe ande amaro gazdaripe, ni lallau te ppenau gala ezgode, soke o Gazda o Jesukristo dia amen gava gazdaripe te sai pomozi tumen te pachan mai but ande lete a na te zatri tumen.

⁹ Ni kamam te mislin tumen kai mangau te daravau tumen gale lilenchar kai pisiu tumenge.

¹⁰ Soke si nesave llene kai ppenen kai gala lila kai pisiu tumenge si zurale ta silne, ta i ppenen kai kana sem tumenchar ta dau orba sem kovlo, ta kai ni llanau te dau orba sukar, ta kai ni ttoven mange sama kana dau orba.

¹¹ Gala llene morabi te llanen kai kana ka llau tumende ka avau zuralo isto gia sar sem ande lila kai pisiu tumenge duratar.

O Pablo chacharelpe

¹² Soke nikada ni ka ppena kai sam sargo gola llene kai falin isto von pe. Von cheren iek baro dilipe, soke isto pe misloia mangen te llanen ko si mai llanglo iek averetar.

¹³ Amen ni ka da orbe lache isto amendar llik so sai cherale. Soke o Del si kai ppenel llik kai sai cherale, ta vou si kai ppenel llik kai resel amaro rado, ta vou mukla amen te resa llik tumende kai sen ando Korinto.

¹⁴ Goleke ni da mai but orbe neko so si te da, soke amen sama gola kai mai anglal inllardam tumenge e lachi viasta e Kristoki.

¹⁵ Ta ni fali amen ande averengo rado kai cherde, soke so amen adurichara si isto gia sar bariol tumaro pachape te bariol i o rado kai chera maskar tumende.

¹⁶ Ta manga te inllara e lachi viasta ios mai dur katar sen tumen, ta ni ka lla kote kai aver ttodepe te radin te na fali amen ande averengo rado.

¹⁷ A vareko te mangela te falilpe, te falilpe ando Gazda.

¹⁸ Soke o lleno kai morabi te den le liubao, si gua kai o Del blagosil le, a na gua kai blagosil vou pe.