1 Timoteo 6 - Nuevo Testamento Romané 2007

¹ E llene kai si esluge morabi te avel len liubao pe gazdenchar, te na den orbe bilache katar o Del ta katar amaro sikadipe.

² A gola kai lengo gazda pachal morabi te na jasaren lea o liubao samo soke si tumaro pplal ando pachape. Morabi te radin lenge ios mai sukar, soke tumen volin len ta soke i von pachan. Sikau ta de gaia orba:

O chachuno barvalipe

³ Vareko te sikavela iek sikadipe kai niko ni pinllarel, ta ni pachal ando sasto sikadipe katar o Gazda o Jesukristo ta ni ande so sikavel amaro pachape,

⁴ gua lleno si iek barikano kai ni llanel niso. Gua lleno jalpe ta gua si sargo leko nasualipe, ta goleke e llene murzin, kusenpe, jasaren e vera

⁵ ta marenpe suako llive e llene kai lenge mislura si melale ta ni pinllaren o chachipe, ta o pachape si lenge iek rado te barvaon.

⁶ A chachimaia si iek baro barvalipe samo e llenenge kai si vesele ande so si len.

⁷ Soke niso ni andam ande gava sueto ta niso nasti inllara amenchar;

⁸ te si amen so te ja ta so te ttova pe amende sai ava vesele.

⁹ A gola kai mangen te barvaon peren ando zumadipe ta kojadon, ta zelin but ezgode dile kai murin len ta zatril len, ta cherel len te jasaon.

¹⁰ Soke o volipe pe love anel suako bilachipe; a si nesave llene kai durile katar o pachape pala o volipe kai si len pe love, ta cherde peke bare nuzde.

E orba e Timoteoke

¹¹ A tu, Devleko manus, nas katar sa gala ezgode. Morabi te ave chacho, Devlikano, te avel tut pachape, volipe, te ave zuralo ande nuzda, ta cho lio te na avel barikano.

¹² Lla po lacho drom katar o pachape; le o zivoto ostade, soke goleke ikkarda tut o Del, ta goleke dian orba sukar katar cho pachape angla but llene.

¹³ Akana angla o Del, kai cherda suako ezgoda, ta angla o Jesukristo, kai dia orba sukar ta orba chachi angla o Ponsio Pilato, mangau tutar

¹⁴ te kande so ppenau chuke ta te ave chacho ta niko te na dosarel tut lligo ni ka avel blagosimaia amaro Gazda o Jesukristo.

¹⁵ Ta kana ka avel orta o vreme kai o Del llanel ka cherel gaia ezgoda, soke samo o Del si o edino ta blagosime kai gazdaril pe sa, Charo katar e charura ta Gazda katar e gazde.

¹⁶ Vou si o edino kai ni merel, kai zivil ande iek villelo kai niko nasti avel pase. Nisavo manus ni dikkla le ta nasti dikkel le. ¡Leko si ostade o baripe ta e zor! Gia te avelpe.

¹⁷ Ppen e barvalenge katar gava sueto, te na aven barikane, ta te na ttoven pi vera ande po barvalipe soke o barvalipe sai jasardol. Mai sukar si te ttoven pi vera ando Del soke vou del amen but katar suako ezgoda lachi amenge.

¹⁸ Ppen lenge te cheren o lachipe, te aven barvale ande lache ezgode kai cheren ta te fulaven averenchar so si len.

¹⁹ Ta gia ka avel len barvalipe kai ka pomozil len mai angle, ta ka len o zivoto ostade.

O Pablo ppenel e Timoteoke te pachal so ppenda leke

²⁰ Timoteo, cher sa so ppendem chuke. Na asun so ppenel o sueto kai ni pachal, ni e alava kojamne kai von ppenen kai si o chachipe;

²¹ soke nesave llene kai ppenen kai len si gua bizaipe, durile katar o pachape. O Gazda te del tumen katar po volipe.