1 Timoteo 2 - Nuevo Testamento Romané 2007

Morabi te moli amen pala sa o sueto

¹ Mai anglal mangau tumendar te molintumen pala sa o sueto, te den fala e Devle pala suako ezgoda ta te mangen letar te sikavel tumenge kai vou si posteno ta te pomozil tumen.

² Molintumen pala e kraliura ta pala e llene kai gazdarin, te sai avel amen iek zivoto esmiro, ta ande pas.

³ Soke gava molipe si drago e Devleke amaro Braduinari,

⁴ soke vou mangel sa e manusa te braduinpe ta te pinllaren o chachipe.

⁵ Soke samo iek Del si, ta samo iek manus kai si po maskaral katar o Del ta e manusa: o Kristo Jesus.

⁶ Soke vou pochinda pe zivotoia te sai braduil sa e sueto, ta katar gala ezgode diape e orba chachi orta po vreme.

⁷ Goleke sem ttodo te ppenau gaia orba ta i apostol, ta si man o rado te sikavau katar o pachape ta katar o chachipe e llenenge kai inai judiura. So ppenau si chachipe; ni kojavau.

Sar morabi te aven e murus ta e diskinia

⁸ Mangau te molinpe e murusa kai go te aven, ta te vazden pe va e Devleke iekke liea chisto ta te na avel joli ni te janpe.

⁹ Ta mangau katar e diskinie te furiadon sukar liubaimaia, te na furiadon barimaia, te na lacharen pe bal barikamaia, te na ttoven ni sunakai ni klea ni patave kai si but kuch.

¹⁰ O sukaripe kai morabi te ttoven pe pete si e lache ezgode kai cheren, gia sar morabi te aven e diskinia kai mangen te blagosin e Devle.

¹¹ E diskinia morabi te asunen esmiro ta liubaimaia so sikaven;

¹² ta ni mukau e diskinien te sikaven angla e llene ta te na gazdarin po murus. Mangau te achen esmino,

¹³ soke o Del mai anglal cherda e Adane ta mapalal e Eva;

¹⁴ ta o Adan ni avilo kojadino, e diskinia avili kojadini; ta sar avili kojadini, peli ando bilachipe.

¹⁵ A e diskinia ka avel braduime te cherda po rado sargo dei, ta te avila la bizaipe ando pachape, ando volipe ta ande santidad liubaimaia.