1 Timoteo 1 - Nuevo Testamento Romané 2007

Salami

¹ Me o Pablo, o apostol e Jesukristoko; bichaldo soke o Del amaro Braduimari mangla, ta o Kristo Jesus kai adurichara le,

² bichalau iek salami e Timoteoke, vou si iek chavo chachuno ando pachape. O Del amaro Dad ta o Kristo Jesus amaro Gazda te blagosil tut ta te del tut katar po volipe katar pi zalba ta katar pi pas.

Arakken tumen katar o sikadipe kojamno

³ Kana llelemtar katar e Masedonia manglem tutar te ache ando Efeso, ta akana pale mangau tutar te de pe nesave llenen te na sikaven orbe kojamne

⁴ ta te na jasaren o vreme ande paramiche ta ande orbe katar e viche kai ni getonpe nikada. Gola orbe samo anen e joli ta ni sikaven e Devleki volia kai si ando pachape.

⁵ Gaia orba cherel amen te voli iek avere ta gua volipe te likel katar iek lio chisto, katar iek lacho mislo ta katar iek pachape chacho.

⁶ Nesave llene durile katar gala ezgode ta jasaon ande orbe kai ni inllaren ninde.

⁷ Von mangen te aven kovacha katar o zakono e Devleko a von ni llanen ni katar so den orba.

⁸ Llana kai o zakono si lacho kana cherdol lea so o zakono mangel.

⁹ Llana kai ni iek zakono ni delpe e llenenge kai cheren o lachipe. O zakono si e llenenge kai ni ttoven sama nikake, kai ni kanden, e bilachenge, golenge kai ni den liubao e Devle, e llenenge kai mundaren pe da o pe dade, sa e llenenge kai mundaren,

¹⁰ golenge kai cheren o kurvaluko, e murusenge kai cheren o kurvaluko isto e murusenchar, golenge kai bichinen esluge po chorial, e kojamnenge ta sa golenge kai jan sovel bange; sa e llene kai ni llan prema o chacho sikadipe.

¹¹ Ta gua si so sikavel e glamni lachi viasta kai o Del o blagosime dia mande te sikavau.

E zalba e Devleki e Pabloia

¹² Dau fala goleke kai dia man e zor, o Kristo Jesus amaro Gazda soke leke sem lacho ta ttoda man te radiu leke,

¹³ a me omanglal ppenava bilache ezgode letar, llava te marau man e llenenchar kai pachan ande le ta kusava le. A e Devleke avila zalba mandar, soke ondaka me ni pachava ta ni llanava so cherava.

¹⁴ Ta amaro Gazda cherda pi volia manchar, ta dia man o pachape ta o volipe kai sai avel amen pala o Kristo Jesus.

¹⁵ Gava si chachipe ta saurre morabi te pachan: kai o Kristo Jesus avilo pe ppuv te braduil e bilachen, ta me sem o purvo lendar.

¹⁶ Goleke o Del avila leke zalba mandar, te sai sikavel o Jesukristo po volipe. Ta gia te sikon mandar e llene kai ka pachan ande lete te sai len o zivoto ostade.

¹⁷ ¡Bariara ta blagosisara e Charo kai gazdaril ostade, gua kai ni merel kai ni dobil le niko ta amaro edino Del! Gia te avelpe.

¹⁸ Chavea Timoteo, mangau tutar gala ezgode prema e poroke kai ppende tutar ta prema goia porouka te lla angle po lacho drom ando pachape ta ando lachipe.

¹⁹ Ta te na jasare cho pachape ta che lache mislura. Nesave llene jasarde po pachape soke ni ttode sama pe so ppenela lenge lengo lio.

²⁰ Ta gua avilape e Imeneoia ta e Alejandroia, goleke diem len kai o Satanas te sai sikon te na kusen e Devle.