1 Tesalonisense 5 - Nuevo Testamento Romané 2007

¹ Pplalalen, inai soke te pisi tumenge niso katar o vreme, ni kana si te aven gala ezgode.

² Tumen llanen kai o llive kana o Gazda ka irilpe ka avel kana niko ni uzdil pe, sargo iek chorano kai avel orachaia.

³ Kana e llene ka ppenen: “Sa si esmiro ta inai soke te dara”, ondaka ka avel pe lende oma e zatrania, sargo kana aven e dukka pe diskinia kai si kkamni, ta nasti ka nasen.

⁴ Goleke tumen pplalalen, inai sen ando truñariko te chudin tumen kana ka avel sargo kana avel iek chorano.

⁵ Saurre sen e villeloke ta e lliveseke.

⁶ Inai sam katar e riat ni katar o truñariko, goleke trubul te na sova sargo ogola llene; morabi te acha llungade ta te ava traze.

⁷ Gola kai soven, soven orachaia, ta gola kai maton, maton orachaia;

⁸ a amen kai sam e lliveseke, morabi te ava traze. Trubul te arakka amen, ta o pachape ta o volipe te avel pe amende sargo iek kora sastruni, ta o pachape kai ka ava braduime te avel pe amaro soro sargo iek challi sastruni.

⁹ Soke o Del ni chinada amenge e patnia, o Del chinada amenge te resa kai o braduipe pala amaro Gazda o Kristo.

¹⁰ O Jesukristo mulo pala amende, ta gia te achilam llungade o te soutam ande lindri e merimaki, te zivi lea.

¹¹ Goleke, den tumen zor iek avere, isto gia sar cherenle.

Sar si te aven e llene kai pachan ando Kristo

¹² Pplalalen, manga tumendar te avel tumen liubao e llenenchar kai radin maskar tumende, golenchar kai gazdarin ande ezgode e Gazdake ta kai den pe tumende te sikaven tumen.

¹³ Trubul te volin len but, pala o rado kai cheren. Zivin ande pas iek averea.

¹⁴ Ta i manga tumendar pplalalen, te den pe llene kai ni kamen te radin, te den vlaga gole llenen kai inai vrene, te pomozin golen kai inai len zor ta te avel tumen vreme saurrenchar.

¹⁵ Ttoven sama te na pochinel niko avereke o bilachipe e bilachimaia. Morabi te cheren o lachipe suako llive maskar tumende ta i saurrenchar.

¹⁶ Morabi te aven vesele suako llive.

¹⁷ Molintumen sorro llive.

¹⁸ Den fala e Devle pala sa so del tumen, vou mangel tumendar goia ezgoda soke pachan ando Kristo Jesus.

¹⁹ Na mundaren e iag katar o Santo Duo.

²⁰ Na mislin kai e porouke ni mol len but.

²¹ Zumaven ta len so si mai lacho.

²² Durion katar suako bilachipe.

²³ Isto o Del, o Del katar e pas te cherel tumen sante chachimaia ta te arakkel tumari esnaga ta tumaro duo te na avel ando bilachipe, kana ka avel o Gazda o Jesukristo.

²⁴ Gua kai ikkarel tumen si chacho, ta ka cherel sa gala ezgode.

²⁵ Pplalalen, molintumen i pala amende.

²⁶ Den salami ta iek chumidipe santo saurren.

²⁷ Mangau tumendar ando anau e Gazdako te chitin gava lil sa e pplalenge.

²⁸ Amaro Gazda o Jesukristo te del po volipe saurren.