1 Tesalonisense 4 - Nuevo Testamento Romané 2007

Sar si drago e Devleke te zivi

¹ Goleke pplalalen, gia sar sikilen amendar te aven drago e Devleke ta llana kai cherenle, manga tumendar ando anau katar o Gazda o Jesus te sikon suako llive mai but te sai ppiren po zivoto.

² Tumen llanen so ppendam tumenge te cheren ando anau katar o Gazda o Jesus.

³ E Devleki volia si te avel tumaro zivoto blagosime, te na aven ando kurvaluko

⁴ ta suako lleno te avel murus samo pe romiako lachimaia ta ando liubao,

⁵ ta te na cheren bilache ezgode sargo e llene kai ni pachan ando Del.

⁶ Ande gala ezgode te na kojavel niko iek avere, soke o Del ka patil zurale gole llenen kai cheren gala ezgode, isto sar ppendam tumenge.

⁷ O Del ni ikkarda amen te ava ande ezgode melale, o Del mangel te ava llene sante.

⁸ Goleke, ko ni ttovela sama gale alavenge inai kai ni kandel amen, ni kandel e Devle kai dia tumen po Santo Duo.

⁹ Inai soke te da tumenge orba katar o volipe kai si te avel tumen maskar e pplal, soke isto o Del sikada tumen te volin iek avere.

¹⁰ Ta gia cherenle tumen sa e pplelenchar kai zivin ande Masedonia.

¹¹ Zivin esmiro ta radisaren ande tumare ezgode; radin tumare vastenchar gia sar ppendam tumenge,

¹² ta e llene kai ni pachan te avel len liubao tumenchar ta te na aven istarde pe nika.

O Gazda irilpe

¹³ Pplalalen, manga te llanen so ka avelpe e llenenchar kai mule, te na triston tumen sargo ogola llene kai ni aduricharen niso.

¹⁴ Amen pacha kai o Jesus mulo ta ustilo katar o meripe, ta pacha kai isto gia o Del ka cherel e Jesusea te usten katar o meripe sa e llenen kai pachaie ande le.

¹⁵ Goleke ppena tumenge sar sikada amen o Gazda, kai amen gola kai ka acha llunde lligo ni ka avel o Gazda, ni ka ava mai angle neko gola kai mule.

¹⁶ Soke isto o Gazda ka fuliel katar o miloso ta ka asundol iek avazi kai gazdaril, o avazi katar o gazda e suechonengo, ta ka asundol e taturuga e Devleki. Ta gola kai mule ta pachaie ando Kristo, ka usten mai anglal;

¹⁷ mapalal gola kai ka acha llunde ka ava inllarde lenchar ande oblakura, ta ka maladiva e Gazdaia ando miloso; ta gia ka ava lea ostade.

¹⁸ Den tumen zor iek avere gale alavenchar.