1 Tesalonisense 2 - Nuevo Testamento Romané 2007

O Rado e Pabloko ande Tesalonika

¹ Pplalalen, tumen llanen kai kana llelam tumende ni cherdamle samo gia.

² Tumen llanen kai omanglal kusle amen ta marde amen ando Filipos ta o Del pomozisarda amen te ppena e lachi viasta tromanimaia ta ande iek bari nuzda.

³ Soke ppenaia o chachipe, ta ni cheraiale bilachimaia ta ni te kojava nika.

⁴ A o Del pomozisarda amen ta dia amende o rado te ppena e lachi viasta, ta goia si e orba kai da. Ni kamam te ava drago e manusenge, manga te ava drago e Devleke kai llanel sa so si ande amaro lio.

⁵ Tumen llanen kai nikada ni ppendam tumenge alava sukar te ava tumenge drago, ta ni kojadam tumen te la tumendar love. Angla o Del ppenale tumenge.

⁶ Nikada ni rodiam e llenendar te den amen liubao: ni tumendar ni averendar.

⁷ Amen sai cherdama te acharen kai gazdari pe tumende soke sam apostolura e Kristoke, a cherdilam sargo minone maskar tumende. Sargo iek dei kai bariarel ta arakkel pe minonen,

⁸ isto gia amen voli tumen soke diam tumen e lachi viasta e Devleki, ta sai dia man i amaro zivoto pala tumende.

⁹ Pplalalen, den tumen golli sar radia ta sar trudia amen te la love te zivi. Sorro llive radia te na ava tumenge iek pparipe, ta ppenaia tumenge e lachi viasta e Devleki.

¹⁰ O Del ta i tumen dikklen kai sa gola ezgode cherdamlen chachimaia ta orta tumenchar kai sen e llene kai pachan.

¹¹ Tumen llanen kai suakone llenea tumendar sama sargo iek dad pe chaurrenchar,

¹² ta ppendam tumenge te llan sar o Del mangel, vou ikkarda tumen te aven ande iek ttan lea ande leko foro ta ande leko blagosipe.

¹³ Goleke amen da fala e Devle, soke kana asunden e porouka kai andam tumenge lienla sargo e Devleki porouka a na sargo e manusengi. A chachimaia si e porouka e Devleki, soke cherel te achardol pe tumende kai sen llene kai pachan.

¹⁴ Tumen nakklen isto so nakkle e llene katar e Devleki kkanlliri kai si ande Judea, soke e llene katar tumaro foro cherde tumen te nakken patnia isto sar e judiura cherde te nakken patnia e llene katar gola kkanllira.

¹⁵ Gola judiura mundarde e Gazda e Jesuse isto sar omanglal mundarde e poraukonen ta tradie amen. E Devleke inai drago sar si von, ta si silne saurrenchar,

¹⁶ soke ni muken amen te da orba e llenenchar kai inai judiura, te sai braduinpe i von. Golea von cheren te pperdol lengo bilachipe. A o Del ka patil len zurale.

O Pablo mangel te llal ande Tesalonika pale

¹⁷ Pplalalen, kana fuladilam tumendar ta nakklo o vreme, tumen inai sena dur soke sena ande amaro lio ta zelia te lla te dikka tumen.

¹⁸ But droma manglam te lla, ta i me o Pablo mangava te llau, a o Satanas ni mukla amen.

¹⁹ Tumendar adurichara but ta tumen ka aven amari veselia ta amaro baripe angla o Gazda o Jesus kana vou ka irilpe.

²⁰ Tumen sen amaro baripe ta amari veselia.