1 Tesalonisense 1 - Nuevo Testamento Romané 2007

Salami

¹ Me o Pablo, o Silvano ta o Timoteo bichala salami e llenenge kai pachan ando Jesus kai si katar o foro o Tesalonika, ta si pasa o Del o Dad ta pasa o Gazda o Jesukristo. O Del te blagosil tumen ta te del tumen po volipe ta pi pas.

Fala e Devleke

² Suako llive da fala e Devle cheres tumende, ta da amen golli tumendar kana moli amen.

³ Ta suako llive da amen golli angla o Del amaro Dad katar tumaro pachape ta katar o rado kai cherden, ta kai sen gia pachivale ande tumaro volipe, soke kana sena ande patnia gia bari saia tumari vera ando Gazda o Jesukristo.

⁴ Pplalalen kai sen volime e Devletar, llana kai vou esvirisarda amen.

⁵ Soke kana ppendam tumenge e lachi viasta, ni cherdamle samo alavenchar, o Del sikadilo ande pi zor amenchar ta o Santo Duo radisarda ta dia but lachipe. Tumen llanen kai amen rodaia o lachipe tumenge.

⁶ A tumen sikilen amendar ta katar o Gazda, ta lien e porouka ande veselia kai dela tumen o Santo Duo ande bare patnia kai nakkena.

⁷ Ta gia sikile tumendar ande Masedonia ta ande Akaia sa e llene kai pachan ando Jesus.

⁸ Ta tumendar likisti e lachi viasta e Gazdaki ta asundili pe suako rig, na samo ande Masedonia ta ande Akaia, ta llanen katar o pachape kai si tumen ando Del, goleke inai amen so te ppena tumendar.

⁹ Isto von ppenen so cherdam kana llelam tumende ta sar muklen avere delen, ta sar irisailen kai o Del o llundo ta chachuno te radin leke.

¹⁰ Ta sar aduricharen te irilpe katar o miloso e Devleko Chavo kai o Del cherda le te ustel katar o meripe. O Jesus si gua kai braduil amen katar e bari patnia kai avel.