1 Pedro 5 - Nuevo Testamento Romané 2007

E orba golenge kai gazdarin ande kkanlliri

¹ Akana mangau te ppenau golenge kai gazdarin ande tumari kkanlliri kai me sem sargo tumen ta i kai dikklem e patnia kai nakklo o Kristo. Kana vou ka avel pale ka avau lea ande leko baripe.

² Arakken e bakren kai o Del dia tumende; arakken len chache liea, na samo soke si te arakken len pala e love; arakken e bakre e Devleke chachimaia.

³ Na sargo kana gazdarin pe llene kai o Del dia tumende; so morabi te cheren si te aven lache lenchar, ta gia von ka sikon tumendar.

⁴ Ta gia kana ka avel o Chobano kai si o Gazda mai baro, ka del tumen e korona blagosimaki kai nikada ni ka merel.

E orba sa e kkanllirake

⁵ Isto gia tumen e terne morabi te kanden golen kai gazdarin ande kkanlliri ta te kanden iek avere postenimaia, ta na te istardon soke: “E Devleke inai drago e llene kai istardon, a pomozil e llenen kai lengo lio si kovlo.”

⁶ Goleke morabi te aven proste angla o Del soke sen tala leko va, ta vou ka del tumen o baripe kana ka avel o vreme.

⁷ Muken ande Devleke va sa tumare brige, soke vou arakkel tumen.

⁸ Arakken tumen ta ttoven sama soke o llavolo llal sargo iek liono divome kai rodel so te jal.

⁹ Ta terpin leke zurale ando pachape soke tumen llanen kai ande sa e ppuvia si but pplal kai nakken patnia isto sargo tumen.

¹⁰ A kana tumen ka nakken gaia patnia nesavo vreme o Del ka cherel tumen orta ta zurale te na kovlion ta gia suako llive ka avel tumen pachape. Isto o Del kai ande po baro volipe ikkarda amen e Jesukristoia te ava i amen ande leki dragostia ostade.

¹¹ Leke te avel e zor ostade. Gia te avelpe.

¹² O Silvano kai mange si iek pplal chacho pomozisarda man te pisiu tumenge gava lil te sai sikon. Me ppenau kai sa so dia tumen o Del si soke volil tumen but. ¡Goleke achen zurale ande gava volipe!

¹³ E kkanlliri kai si ande Babilonia, kai o Del esvirisarda ta kai i tumen esvirisarda, bichalel tumenge salami ta i mo chaurro o Markos.

¹⁴ Chumiden tumen iek avere volimaia. Te avel tumen pas sa tumen kai sen e Kristoke.