1 Pedro 4 - Nuevo Testamento Romané 2007

¹ Goleke sargo o Kristo kai nakkla patnia ande pi esnaga, i tumen morabi te cheren sargo vou soke te nakken patnia sargo o Kristo ni ka cheren ios bilachipe,

² ta gua ka sikavel saurrenge kai muklen o bilachipe, ta kai sa tumaro zivoto ka cheren e Devleki volia.

³ Omanglal tumen cherena e ezgode kai cheren e llene kai pachan ande aver dela. Cherena bilache ezgode, piena, jana ta dena changa angla e dela kojamne.

⁴ A akana tumen ni llan gole llenenchar, a von den bilachi orba tumendar.

⁵ A von ka aven ando llive e krisako, kana o Krisari ka chinel e kris e llundenge ta e mulenge.

⁶ Soke i e mulenge sikade e lachi viasta te sai zivin prema o duo; kana pe gava sueto krisisarde len e manusa.

Te radin averenge

⁷ Akana si pase o son. Goleke arakken tumen ta molintumen but e Devleke.

⁸ Te avel maskar tumende volipe, soke o volipe prostil but bilachipe.

⁹ Te aven tumen pachivale iek averea ande tumare chera, ta na den bilachi orba lendar.

¹⁰ O Del dia saurren iek buchi te radin, goleke radin averenge.

¹¹ Kana fiko ka del orba, te avel gaia orba sargo e Devleki. Kana ka radin, radisaren sa e zoriaia kai o Del del tumen. Sogo ka cheren, cherenle te avel blagosime o Del pala o Jesukristo, kai leko si ostade o baripe ta e zor.

E veselia ande patnia

¹² Pplalalen na chudin tumen, soke o zumadipe kai tumen nakken inai iek ezgoda nevi.

¹³ Veselin tumen kai nakken e patnia kai o Kristo nakklo, te aven vesele kana ka avel o Kristo pale o duito ande po baripe ta ande pi zor.

¹⁴ Blago tumenge kana ka kusen tumen pala o Kristo, soke o Duo e Devleko ka avel suako llive tumenchar.

¹⁵ Inai sukar te nakkel patnia vareko tumendar soke chorda o mundarda o soke amisailo ande averengi buchi.

¹⁶ A te nakkel patnia soke vou pachal ando Kristo, inai soke te jal lallao. Vou morabi te blagosil e Devle soke pachal ando Kristo.

¹⁷ A akana si o vreme kana o Del ka chinel e kris saurrenge, ta mai anglal ka krisil pe foro. A te si gia, kai amen kai sam leko foro nakka patnia ¿sar ka avel golenge kai ni kanden e viasta e Devleki?

¹⁸ A te si gia, kai e lachenge si trudno te aven braduime, ¿so ka avel e bilachenge?

¹⁹ Goleke, sa gola kai nakken patnia pala e volia e Devleki, morabi te cheren o lachipe suako llive, ta te ttoven pi vera ando Del kai dia len o zivoto soke vou si chachuno.