1 Pedro 3 - Nuevo Testamento Romané 2007

So morabi te cheren e zinime

¹ Tumen e romia kanden tumare romen ande sa, soke von te na pachan ande lachi viasta, kana ka dikken tumare lache ezgode kai tumen cheren, ka pachan ande lachi viasta ta ni ka trubul tumenge te sikaven len e orba e Devleki te sai pachan,

² soke von ka dikken kai tumen sen lache ta kai blagosin e Devle.

³ Na mislin kai o sunakai o e klea o e patave kai mol len but love ka cheren tumen ios mai sukar,

⁴ o sukaripe inai so dikkol avrial; soke o sukaripe chachuno kai si ando lio si kana o manus si pachivalo ta guglo. Gua sukaripe nikada ni jasaol ta angla o Del si but kuch.

⁵ Gia sea e diskinie sante kai zivisarde omanglal; len saia vera ando Del ta kandena pe romen.

⁶ Gia saia e Sara kai kandela pe Abraame ta ikkarda le “mo gazda”. A tumen te cheren o lachipe ta ni daran nisotar, ka aven sargo voi.

⁷ Tumen e roma morabi te aven lache tumare romienchar, soke len inai e zor kai si tumen ta kai o Del ppenda lenge kai ka del len o zivoto ostade soke te cherena gia o Del ka asunel tumare molipe.

So morabi te cheren sa e llene kai pachan ando Jesus

⁸ Sa tumen morabi te aven lache iek averea; te volin tumen sargo lache pplal, te aven lache ta te na istardon.

⁹ Te na aven bilache e llenenchar kai si bilache tumenchar, o te kusen gole llenen kai kusen tumen. So morabi te cheren si te blagosin gole llenen, soke o Del ikkarda tumen te len o blagosipe.

¹⁰ Soke: “Ko volil o zivoto ta mangel te avel veselo, morabi te arakkelpe te na del orba bilachi ta te na kojavel;

¹¹ te duriol katar o bilachipe ta te cherel o lachipe, te na avel joliariko pe nika.

¹² Soke o Del arakkel golen kai si lache asunel lengo molipe, a inai leke drago e bilache.”

¹³ ¿Ko ka cherel tumenge o bilachipe kana tumen trudin tumen te aven lache suako llive?

¹⁴ A te nakken patnia soke cheren o lachipe, ¡blago tumenge! Na daran nikatar,

¹⁵ den liubao e Kristo sargo Gazda ande tumaro lio. Ta suako llive te aven lacharde te sikaven e llenenge kai puchen tumen ande so pachan tumen,

¹⁶ ta kana ka sikaven, na istardon. Te na avel dos ande tumare mislura, ta gia kana ka den orba bilachi tumendar ka avel lenge lallao soke tumen zivin orta.

¹⁷ Mai sukar si te nakken patnia pala o lachipe kai cheren, te si e volia e Devleki, neko te nakken patnia pala o bilachipe.

¹⁸ Soke o Kristo mulo pala amaro bilachipe iek drom ostade. Vou saia bidosako a nakkla patnia pala e llene bilache te inllarel len kai o Del. Ande pi esnaga manuseki mulo; ta ustilo katar o meripe ande iek zivoto duoko.

¹⁹ Ta gia llelo kai e duura kai sea ppangle te ppenel lenge kai vou dobisarda.

²⁰ Gala duura ni kandie e Devle ando vreme katar o Noe. A Del aduricharda len te keimpe, kana o Noe cherela e bari llimia, a von ni kamle. Samo nesave llene die ande bari llimia ta ni mule kana avilo o baro bursin, soke isto o pai braduisarda gole ojto llenen.

²¹ Ta gua pai si sargo o pai katar o kristope, kai ande lete amen sam braduime. O kristope chachuno inai te jalavel amare esnage; o kristope chachuno si te manga e Devletar te chistol amen katar sa e mislura dosale. A o Del braduil amen ando kristope soke o Jesukristo ustilo katar e meripe,

²² ta llelotar ando miloso ta si besindo pe rig e chachi e Devleki, ta gazdaril pe sa e suechura ta pe sa e zivotura duoke kai si len zor ta gazdarin.