1 Pedro 1 - Nuevo Testamento Romané 2007

Salami

¹ Me o Pedro apostol e Jesukristoko, blagosiu golen kai zivin dur katar lengi ppuv, ando Ponto, Galasia, Kapadosia, Asia ta Bitinia,

² gia sar saia leki volia o Del o Dad ezvisarda tumen te aven leko foro, ta e Santone Duoia ta e merimaia e Jesukristoki chistosarda len katar sa o bilachipe te cheren leki volia. Mangau o Del te volil tumen but ta te del tumen te zivin ande pas.

Blagosisara e Devle

³ Blagosisara e Devle, Dad amare Gazdako o Jesukristo, kai pala e zalba kai si le pe amende cheres o Jesus kai ustilo katar o meripe pparruda sa amaro zivoto, i kana amen ni sam lache o Del volil amen a cheres po baro volipe pparruda amaro zivoto, gia suako drom te avel amen vera ande amaro braduipe,

⁴ ta ka cherel te len tumen o baro chari kai o Del guruvel tumenge ando miloso ta kai nasti zatrilpe.

⁵ Pala o pachape kai si tumen ando Del, vou arakkel tumen te sai len o braduipe kai vou guruvel te sikavel le ande llivesa kai si te aven mai angle.

⁶ Goleke tumen sen vesele, a akana si o vreme kai morabi te nakken ando zumadipe ta e duk.

⁷ Soke tumaro pachape si sargo o sunakai kai morabi te zumadol ande iag dal si lacho. O pachape kai si zuralo ando zumadipe mol le mai but neko o sunakai, ta o sunakai zatrilpe. Isto gia tumaro pachape kana ka avel zumado ta ka achel zuralo, ka lel o chari glamno ta i sukar kana ka avel o Jesukristo.

⁸ Tumen volin e Jesukristo, ta ni dikklen le; ta pala o pachape kai si tumen ande le, ka avel tumenge iek bari veselia kai nasti sikavenla orbenchar,

⁹ soke ka resen kote kai mangen te aven, ando pachape kai gua si o brauipe.

¹⁰ E poraukura ppende katar o braduipe ta ppende kai o Del pala e zalba kai si le pe tumende ka braduil tumen.

¹¹ O Duo e Kristoko cherela e poraukonen te llanen ko ka avel o Mesias ta kana saia te avel ando sueto.

¹² A o Del dia len te llanen na pala lende, gua dia len te llanen pala tumende. Gaia si e viasta kai von sikade tumen, ta sikade le e Santone Duoia, kai saia bichaldo e milosotar. ¡Gala ezgode e suechura mangena te dikken!

¹³ Goleke, arakken tumen ta mislin tumen so ka cheren, te aven suako drom orta. Morabi te avel tumen vera kai ande Devleko volipe kana ka irilpe o Jesukristo ka del tumen lachipe.

O Del ikkarel amen pala o zivoto nevo

¹⁴ Omanglal pinllarena e lachi viasta e Jesukristoko, tumen cherena sogo kamena. A akana tumen morabi te kanden e Devle ande sa, sargo chaurre lache.

¹⁵ Goleke na cheren o bilachipe ta achen sante, soke o Del esvirisarda tumen te aven leko foro,

¹⁶ ta ando Pisipe ppenel: “Me sem iek Del inai sargo ogola dela, pala gua tumen morabi te na aven sargo o sueto.”

¹⁷ O Del si o krisari saurrenge na samo nesave llenenge. Vou ka chinel e kris katar sa so cherdam amen; goleke, te ppenen tumen kai o Del si tumaro Dad, morabi te blagosisaren le ostade.

¹⁸ Soke o Del ikkarda tumen kana zivina samo gia, gia sar sikadea tumen tumare dada; ta llanen kai pala tumaro braduipe vou ni pochinda ezgodenchar kai sai zatrinpe;

¹⁹ vou braduisarda tumen cheres e Kristoko rat. Kai saia dino sargo iek kurbano lacho vi dosako.

²⁰ Gua chinadale o Del mai anglal te cherel e sueto, ta o Kristo avilo ande gaba vreme tumare lachimake.

²¹ Cheres o Kristo tumen pachan ando Del ta pachan kai o Del vazdia le katar o meripe ta dia le baro luibao, goleke tumen ttoden tumaro pachape ta tumari vera ando Del.

²² Akana kanden e viasta chachuni goleke o Del chistosarda sa tumaro bilachipe te avel volipe maskar tumende. Morabi te volin iek avere chache e liea ta sa e zoraia.

²³ Soke pale biandilan, na datar ta dadetar, biandilan katar e alava e Devleke, kai si llunde ta achen ostade.

²⁴ Soke o Pisipe ppenel: “Sa e manusa si sargo e patra, e patra sukon ta e lulunlla peren,

²⁵ a e Devleke alava achen ostade”. Ta gaia si e viasta lachi kai me ppenau tumenge.