1 Korintios 9 - Nuevo Testamento Romané 2007

So sikavel o Pablo

¹ Me sai cherau sa so cherel iek apostol, soke dikklem e Jesuse amaro Gazda, ta pala mo rado kai cherau e Gazdake tumen sen e Kristoke.

² Sai avelpe kai averenge me ni sem apostol; a tumenge me sem apostol, tumen pachan ando Kristo ta gua sikavel kai chachimaia me sem apostol.

³ Asunen so ppenau gole llenenge kai janpe manchar:

⁴ I amenge llalpe te den amen jape ta pipe,

⁵ ta i te inllara amenchar amare romien kai pachan ando Kristo, gia sar cherenle ogola apostolura, ta e pplal e Gazdake, ta i o Sefas.

⁶ ¿A sai avelape kai samo e Bernabee ta man nasti pravaren?

⁷ Ni iek boñiko ni pravarel vou pe. Ko radil ande drakka jal katar e drakka; ta ko arakkel e busnien piel o ttut kai ikanen lendar.

⁸ Gaia inai iek orba murni, gava si so sikavel o Pisipe.

⁹ Soke ando zakono kai pisisarda o Moises ppenel gia: “Na achaven te jal e guruve kana ustavel ta trebol o lliu” Ta gava inai kai o Del brigilpe katar e guruva,

¹⁰ gava si soke o Del brigilpe amendar soke o zakono pisisailo cheres amende; llik e llene kai lacharen e ppuv ta i gola kai trebon o lliu pachan kai si len iek isi.

¹¹ Isto gia amen kana ppendam tumenge e lachi viasta, si sargo kana ttodam iek simicha duoki ande tumende. Goleke, cheres amaro rado amen si te la tumendar so trubul amen te zivi.

¹² Te cheren gala ezgode avere llenenchar, ios mai but morabi te cherenle amenchar. A gala ezgode kai saia te cheren amenchar amen ni kamlam tumendar te cherenle, ta amen suako ezgoda terpisardam te na achava e lachi viasta e Kristoki.

¹³ Tumen llanen kai gola kai radin ando cher e Devleko, pravarenpe katar o cher e Devleko. Goleke, gola kai radin pe rig kai denpe e kurbanura, jan katar gua mas kai diape kurbano.

¹⁴ Isto gia, o Gazda mukla gala alava e llenenge kai ppenen e lachi viasta te zivin isto katar e lachi viasta.

¹⁵ A me nikada ni ppendem te cheren manchar gia, ta ni pisiu tumenge te den man vareso. Mai lache te merau a na te len mandar gaia dragostia kai si man.

¹⁶ Me ni ppenau e lachi viasta te faliu man, cheraule soke o Del ppenda mange te cheraule. ¡Ta tesko mange te na ppenava e lachi viasta!

¹⁷ Goleke, me nasti aduricharau te pochinen mange te ppenau e lachi viasta, soke niko ni mangla te cheraule. Chereaule soke o Del ppenda mange te cheraule.

¹⁸ A ondaka so dobisarau me, si e dragostia te ppenau e lachi viasta e Kristoki llabe, ta ni ppenau kai mai anglal morabi te ziviu katar e lachi viasta soke sem apostol.

¹⁹ Goleke, i te na avava ppanglo pe nika, cherdilem esluga saurrengo, te sai anau mai but llenen te pachan ando Kristo.

²⁰ Kana sema maskar e judiura cherdilem sargo iek judio te sai pomoziu golen kai si tala o zakono e Moiseseko; te pachan ando Kristo. Isto me ttodem man tala o gua zakono kana chachimaia me ni sem ppanglo pe lete.

²¹ A gole llenenchar kai ni zivin tala o zakono e Moiseseko, cherdilem sargo iek lendar. A chachimaia me sem ppanglo po zakono e Devleko, soke sem tala o zakono e Kristoko.

²² Kana sema maskar e llene kai si kovle ando pachape cherdilem kovlo sargo iek lendar te sai pomoziu len. Sargo te avela, cherdilem sar si suako lleno te sai pomoziu te aven braduime nesave lendar.

²³ Sa gala ezgode cheraulen pala e lachi viasta, te sai avel man isi laia.

²⁴ Tumen llanen kai kana sa prasten samo iek dobisarel. Goleke morabi tumen te prasten sar trubulpe te sai dobisaren.

²⁵ Gola kai lacharenpe te chelenpe pe varesavi ezgoda, arakkenpe katar suako ezgoda te na jasaren pi zor te sai dobin iek korona patrengi kai but oma murilpe; a amen cherale te dobisara so ni ka murilpe nikada.

²⁶ A me ni prastau bi te llanau kai llau ta ni marau man sargo kana dau dumukka ande balau.

²⁷ Me dukkavau mi esnaga te sai cherau la te kandel man pe zor te na avau me ikando katar o prastipe kana me sikadem averen.