1 Korintios 8 - Nuevo Testamento Romané 2007

O kurbano ta o jape avere devlenge

¹ A cheres o jape kai den le kurbano avere devlenge. De istina si so ppenen e llene: kai saurre llana so si o chachipe; a o llanglipe cherel amen te istardiva, a o volipe del amen zor.

² Te mislilape vareko kai llanel vareso, ni llanel niso sar saia te llanel le.

³ A vareko te volil e Devle, gole pinllarel o Del.

⁴ A cheres e orba te jalpe o jape kai del pe kurbano avere devlenge, saurre llana kai gola devla inai len zivoto ta kai samo iek Del si.

⁵ I te avena nesave kai ikkarenpe devla ando miloso o pe ppuv, gia sar si but devla ta but gazde,

⁶ a amenge si samo iek Del, o Dad, kai cherda sa e ezgode, ta amen leke zivi. Ta si samo iek Gazda, o Jesukristo, kai letar sa e ezgode cherdile, ta fala leke amen zivi.

⁷ Na saurre pinllaren o chachipe. Ta nesave kai sea sikade te blagosin avere devlen, llik akana jan katar gua jape soke mislinpe kai gua jape diele kurbano gole devlenge; ta lengi golli kai si kovli, cherel len te mislinpe kai achile melale katar gola devla.

⁸ Bristo si kai o Del lel amen na pala so ja; soke ni ka ava mai lache cheres so jaia, ta ni ka ava mai bilache cheres so ni jaia.

⁹ Arakken tumen so sikilen akana, gava te na cherel te peravel ando bilachipe golen kai si kovle ando pachape.

¹⁰ Soke tu, kai llane gala ezgode, te besea te ja pe iek sinia kai si ttodi avere devlenge, ta varesavo pplal kai si kovlo ando pachape te dikkela tut kai ja, i vou ka mangel te jal pe goia sinia kai die kurbano avere devlenge.

¹¹ Ta gia tu, soke llane gala ezgode, chere che pplale kai si kovlo ando pachape te jasaol, kai i pala le mulo o Kristo.

¹² Kana chere che pplalen te peren katar po pachape, gava bilachipe cherenle isto e Kristoke.

¹³ Goleke, te cherava te perel me pplale ando bilachipe pala o jape, morabi te na jau mas nikada, te na cherau le te perel.