1 Korintios 5 - Nuevo Testamento Romané 2007

Maskar tumende si kurvaluko

¹ Llanglinaila kai iek lleno maskar tumende zivil iekke diskiniaia kai si leke dadeki romi. Gava si iek baro kurvaluko, gaia ezgoda ni dikkol ni maskar e llene kai ni pachan ando Del.

² ¡A tumen falin tumen! ¡Tumenge saia te avel bari zalba! ta saia te traden maskar tumende gole llene.

³ Me i te sem dur tumendar misliu man ande tumende, ta sem tumenchar ando duo; ta me chindem e kris gale lleneke sargo kana sem tumenchar.

⁴ Kana tumen ka chidiniaon, me ka avau tumenchar ando duo, ta e zor katar amaro Gazda, o Jesus, ka avel tumenchar. Goleke, ando anau amare Gazdako o Jesus,

⁵ gole manuse morabi te den le kai o Satanas, ta gia o Satanas i te zatrila leki esnaga, leko duo ka avel braduime kana ka avel o Gazda.

⁶ Tumen inai soke te falin tumen. Soke pinllaren e orba kai ppenel: “Cherricha levadura pukkarel sa o marrno.”

⁷ Goleke, chuden goia purani levadura kai muril tumen, te sai aven cherde sargo o marrno nevo. Chachimaia tumen sen sargo o marrno kai inai le levadura kai jalpe ande llivesa katar e Paskua. Soke o Kristo si o Bakro katar amari Paskua kai mulo pala amende.

⁸ Goleke, morabi te veseli amen ande amari Paskua e marnea kai inai le levadura, kai si o lachipe ta o chachipe, na e purane levaduraia kai si o bangipe ta o bilachipe.

⁹ Ande o gua lil kai bichaldem tumenge ppendem te na avel tumen ni iek posla e llenenchar kai denpe ando kurvaluko.

¹⁰ Gale orbaia ni kamlem te ppenau tumenge te fuladon sa golenchar kai ande gava sueto cheren kurvaluko, o si lakomura o si chor, o kai blagosin avere devlen, te sai tumen cheren gava trubula te liken katar gava sueto.

¹¹ So me mangava te ppenau si te na avel tumen ni iek posla e llenenchar kai ikkardon pplal ta cheren o kurvaluko, o si lakomura, o blagosin avere devlen, o den armaia, o si matarne, o si chorane. Gole llenenchar kai si gia te na besen ni te jan.

¹² Inai mo rado te krisiu e llenen kai inai katar e kkanlliri; tumen morabi te krisin e llenen kai si katar e kkanlliri.

¹³ Soke gola kai inai katar e kkanlliri o Del ka krisin len. Goleke, ikanen maskar tumende gole llene kai si bilacho.