1 Korintios 4 - Nuevo Testamento Romané 2007

E buchi katar e apostolura

¹ Tumen morabi te dikken amen sargo llene kai radi e Kristoke, ttode te sikava e volia gurudini e Devleki.

² Goleke, suako lleno kai die lete varesavi buchi morabi te achardol kai si chacho.

³ Mange ni chitilpe te chinena mange kris, tumen o iek kris e manusengi. Soke isto me man ni krisiu.

⁴ Goleke, ni me mislura ni dosaren man katar niso, i te avelape gia me ni ppenau galea kai me sem bi dosako soke samo o Gazda sai chinel kris pe ma.

⁵ Goleke tumen na chinen kris gia oma; aduricharen kana ka avel o Kristo, vou ka ikanel ando villelo so akana si ando truñariko, ta ka sikavel so si ando lio. Ondaka o Del ka del suakone llene so perel le.

⁶ Pplalalen, dau tumenge gaia orba pala tumaro lachipe, ttovau e Apolo ta isto me man te sikon amendar. Ppendem gala alava te sikon amendar te na llan tumare mislura mai angle neko so si ando Pisipe, ta niko te na falilpe ta te na ppenel kai iek esluga si mai lacho neko aver.

⁷ Soke inai niso te cherel tumen mai lache averetar. Soke sa so si tumen lienle e Devletar. Ta sa so si tumen si fala leke, ¿A soke falin tumen sargo kana so si tumen cherden le korkorre?

⁸ Akana si tumen sa so mangen: Akana sen barvale, ta zivin sargo charura kai ni trubul tumen niso amendar. ¡Gia sukar avela de istina te aven charura, gia amen sai gazdaria tumenchar ande iek ttan!

⁹ Soke misliu man kai amen, e apostolura, o Del mukla amen mai palal, sargo e ppangle kai chinde lenge te meren. Gia si sar dikkel pe amende o sueto ta i e suechura.

¹⁰ E llene dikken amen sargo dile cheres o Kristo; a fala e Kristoke, e llene dikken tumen sargo bizai. Amen sam e kovle, a tumen sen e zurale. E llene den tumen liubao a amenge ni ttoven sama.

¹¹ Llik allive nakka bok, trus ta inai amen patave; e llene cheren amen te nakka bari patnia, ta inai amen ni kai te zivi

¹² ta sam chinie kai radi amare vastenchar. Kana den amen armaia, amen blagosi len; kana nakka bari duk, terpila.

¹³ Kana kusen amen, amen da orba lenchar postenimaia. Amen sam lenge sargo o llubri gale suetoko. Ta gia cheren amenchar i ande gala llivesa.

¹⁴ Ni pisiu tumenge gala ezgode te dau tumen ando lallao, ppenau len te sai sikon, soke voliu tumen sargo kana sen me chaurre.

¹⁵ Sai avel tumen des milie kovacha te sikaven tumen cheres o Kristo, a dada inai tumen but. Samo iek dad si tumen kai sem me, soke kana ppendem tumenge e lachi viasta e Jesukristoki tumen cherdilen me chaurre.

¹⁶ Goleke, moliuman tumenge te sikon mandar.

¹⁷ Goleke bichaldem tumenge e Timoteo, kai voliu le sargo iekke chaurre, soke vou si chacho e Gazdaia. O Timoteo ka del tumen golli sar zivisardem maskar tumende sargo iek lleno kai pachal ando Jesukristo, kai si so sikavau ande sa e kkanllira katar me nakkau.

¹⁸ Nesave llene tumendar acharenpe but tromane soke mislinpe kai me ni ka llau te dikkau tumen;

¹⁹ te mangela o Del, but oma ka llau tumende te dikkau so sai cheren gola kai pe gachin istardon, ta te dikkau dal cheren e orbe kai den.

²⁰ Soke e charoina e Devleki si zor, na samo alava.

²¹ ¿So mangen tumen, te avau tumende iekke kastea ando va, o te avau volimaia ta postenimaia?